“Oltin to‘p” kurashida yuqorilagan Ronaldu, yetakchilarini yo‘qotayotgan “Milan” va Pogba—Varan “rokirovka”si. Eng so‘nggi sport yangiliklari

Dunyo va o‘zbek sportiga oid 21-iyun kunining muhim xabarlari dayjesti bilan tanishing.

O‘zbekiston

O‘zbekistonlik UFC jangchisi Mahmud Murodov Russia Today nashriga katta intervyu berdi. Unda sportchi faoliyatidagi qiyinchiliklar, MMA va boksdagi kumirlari haqida gapirdi.

Jahon

Fransiya terma jamoasi hujumchisi Usmon Dembele Vengriyaga qarshi o‘yinda tizzasini shikastlab oldi. Futbolchi ushbu jarohati tufayli musobaqani davom ettira olmasligi ma’lum bo‘ldi va u terma jamoa tasarrufini tark etdi.

Belgiya yarim himoyachisi Torgan Azar jarohat oldi va jamoasining 3-tur doirasida Finlyandiyaga qarshi o‘yinini o‘tkazib yuboradi.

Shotlandiya terma jamoasi yarim himoyachisi Billi Gilmorda koronavirus aniqlandi. Shu tariqa futbolchi jamoasining 3-tur doirasidagi Xorvatiyaga qarshi o‘yinini o‘tkazib yuboradi.

“Oltin to‘p” kurashi haqida

Goal nashri “Oltin to‘p”ga da’vogarlar reytingini yangiladi. Unga ko‘ra Portugaliya terma jamoasi va “Yuventus” klubi hujumchisi Krishtianu Ronaldu 10-o‘rindan 7-pog‘onaga ko‘tarilgan. Yetakchi hamon Ngolo Kante bo‘lib turibdi. Ro‘yxat bilan tanishing:

1. Ngolo Kante (“Chelsi”, Fransiya);

2. Kilian Mbappe (“PSJ”, Fransiya);

3. Kevin de Bryuyne (“Manchester Siti”, Belgiya);

4. Robert Levandovski (“Bavariya”, Polsha);

5. Romelu Lukaku (“Inter”, Belgiya);

6. Lionel Messi (“Barselona”, Argentina);

7. Krishtianu Ronaldu (“Yuventus”, Portugaliya);

8. Ruben Diash (“Manchester Siti”, Portugaliya);

9. Karim Benzema (“Real”, Fransiya);

10. Fil Foden (“Manchester Siti”, Angliya).

Transfer yangiliklari

“Milan” yarim himoyachisi Xoqon Chalxono‘g‘lu kutilmaganda “Inter”ga o‘tmoqda. Bu haqda futbolchining o‘zi tasdiqladi. Turkiyalik futbolchi “Inter” bilan 3 yillik shartnoma imzolaydi va yiliga 5 million yevro maosh oladi. Chalxono‘g‘luning “Milan” bilan amaldagi shartnomasi ushbu oy yakunida o‘z nihoyasiga yetadi.

“Milan”ning yana bir futbolchisi Janluiji Donnarumma esa Rimda “PSJ” uchun tibbiy ko‘rikdan o‘tdi. Donnarumma ham Milan shahri jamoasini erkin agent maqomida tark etdi.

Joze Mourinyo “Roma”ga Serxio Ramosni olib kelish harakatlarini davom ettirmoqda. 16 yillik faoliyatdan keyin “Real”ni tark etgan 35 yoshli futbolchiga Rim klubi taklif bilan chiqqan. “Roma” yiliga 7,5 million yevro maosh taklif qilmoqda. Ramos o‘ylab olish vaqt olgan.

“Manchester Yunayted” Pol Pogbani “Real” himoyachisi Rafael Varanga almashmoqchi. Ingliz klubi Varanning transferi uchun katta pul sarflash niyatida emas, sababi jamoaning asosiy maqsadi “Borussiya D”dan Jeydon Sanchoni sotib olish bo‘lib turibdi. O‘z navbatida “Real” ham Rafaelni biror futbolchiga almashishni xohlamayapti, madridliklarga Kilian Mbappe (“PSJ”) yoki Erling Holand (“Borussiya D”) transferi uchun pul kerak.