«Олтин тўп» курашида юқорилаган Роналду, етакчиларини йўқотаётган «Милан» ва Погба—Варан «рокировка»си. Энг сўнгги спорт янгиликлари

Дунё ва ўзбек спортига оид 21 июнь кунининг муҳим хабарлари дайжести билан танишинг.

Ўзбекистон

Ўзбекистонлик UFC жангчиси Маҳмуд Муродов Russia Today нашрига катта интервью берди. Унда спортчи фаолиятидаги қийинчиликлар, MMA ва боксдаги кумирлари ҳақида гапирди.

Жаҳон

Франция терма жамоаси ҳужумчиси Усмон Дембеле Венгрияга қарши ўйинда тиззасини шикастлаб олди. Футболчи ушбу жароҳати туфайли мусобақани давом эттира олмаслиги маълум бўлди ва у терма жамоа тасарруфини тарк этди.

Бельгия ярим ҳимоячиси Торган Азар жароҳат олди ва жамоасининг 3-тур доирасида Финляндияга қарши ўйинини ўтказиб юборади.

Шотландия терма жамоаси ярим ҳимоячиси Билли Гилморда коронавирус аниқланди. Шу тариқа футболчи жамоасининг 3-тур доирасидаги Хорватияга қарши ўйинини ўтказиб юборади.

«Олтин тўп» кураши ҳақида

Goal нашри «Олтин тўп»га даъвогарлар рейтингини янгилади. Унга кўра Португалия терма жамоаси ва «Ювентус» клуби ҳужумчиси Криштиану Роналду 10-ўриндан 7-поғонага кўтарилган. Етакчи ҳамон Нголо Канте бўлиб турибди. Рўйхат билан танишинг:

1. Нголо Канте («Челси», Франция);

2. Килиан Мбаппе («ПСЖ», Франция);

3. Кевин де Брюйне («Манчестер Сити», Бельгия);

4. Роберт Левандовски («Бавария», Польша);

5. Ромелу Лукаку («Интер», Бельгия);

6. Лионель Месси («Барселона», Аргентина);

7. Криштиану Роналду («Ювентус», Португалия);

8. Рубен Диаш («Манчестер Сити», Португалия);

9. Карим Бензема («Реал», Франция);

10. Фил Фоден («Манчестер Сити», Англия).

Трансфер янгиликлари

«Милан» ярим ҳимоячиси Хоқон Чалхонўғлу кутилмаганда «Интер»га ўтмоқда. Бу ҳақда футболчининг ўзи тасдиқлади. Туркиялик футболчи «Интер» билан 3 йиллик шартнома имзолайди ва йилига 5 миллион евро маош олади. Чалхонўғлунинг «Милан» билан амалдаги шартномаси ушбу ой якунида ўз ниҳоясига етади.

«Милан»нинг яна бир футболчиси Жанлуижи Доннарумма эса Римда «ПСЖ» учун тиббий кўрикдан ўтди. Доннарумма ҳам Милан шаҳри жамоасини эркин агент мақомида тарк этди.

Жозе Моуриньо «Рома»га Серхио Рамосни олиб келиш ҳаракатларини давом эттирмоқда. 16 йиллик фаолиятдан кейин «Реал»ни тарк этган 35 ёшли футболчига Рим клуби таклиф билан чиққан. «Рома» йилига 7,5 миллион евро маош таклиф қилмоқда. Рамос ўйлаб олиш вақт олган.

«Манчестер Юнайтед» Пол Погбани «Реал» ҳимоячиси Рафаэл Варанга алмашмоқчи. Инглиз клуби Вараннинг трансфери учун катта пул сарфлаш ниятида эмас, сабаби жамоанинг асосий мақсади «Боруссия Д»дан Жейдон Санчони сотиб олиш бўлиб турибди. Ўз навбатида «Реал» ҳам Рафаэлни бирор футболчига алмашишни хоҳламаяпти, мадридликларга Килиан Мбаппе («ПСЖ») ёки Эрлинг Ҳоланд («Боруссия Д») трансфери учун пул керак.