Tojikistonda sel kelishi oqibatida 7 kishi halok bo‘ldi, Qirg‘izistondagi qishloqlar suv ostida qoldi (foto)

Tojikistonda 11-may kuni kuchli yomg‘ir tufayli Xatlon viloyatining bir qator tumanlari va respublikaga bo‘ysunadigan tumanlar hududida sodir bo‘lgan sel toshqinida 7 kishi halok bo‘ldi. Bu haqda hukumat huzuridagi Favqulodda vaziyatlar va fuqaro muhofazasi qo‘mitasining matbuot markaziga tayanib, Asia-Plus xabar berdi.

Favqulodda vaziyatlar qo‘mitasining dastlabki ma’lumotlariga ko‘ra, Xatlon viloyati Shamsiddiniy Shoxin tumanida sodir bo‘lgan tabiiy ofat natijasida toshqin paytida mashinada bo‘lgan 3 kishi halok bo‘lgan.

Shuningdek, Ko‘lob shahrida 3 kishi vafot etgan, ulardan ikki nafari falokat paytida mashinada bo‘lgan, yana biri suvda oqib ketgan. Hisor shahrida poda boqayotgan kishi ham halok bo‘lgan, deya xabar berdi Favqulodda vaziyatlar qo‘mitasi matbuot kotibi.

Tabiiy ofat natijasida inshootlarining buzilishi, shuningdek, yo‘lning yuvilib ketishi qayd etilgan.

Matbuot xizmati kotibi ta’kidlashicha, Tojikiston prezidenti nomidan respublika bosh vaziri Koxir Rasulzoda boshchiligidagi tabiiy ofatlarning zararini aniqlash va oqibatlarini bartaraf etish bo‘yicha hukumat komissiyasi tuzilgan.

Komissiya tarkibiga ichki ishlar vaziri, Milliy xavfsizlik davlat qo‘mitasi, Favqulodda vaziyatlar va fuqaro muhofazasi qo‘mitasi rahbarlari, mamlakatning tegishli vazirlik va idoralari rahbarlari kiritilgan.

Shuningdek, Qirg‘izistonda ham sel tufayli bir nechta qishloq va yo‘llarni suv bosdi.

Qirg‘iziston Favqulodda vaziyatlar vazirligi matbuot xizmati 11-may kuni Qora-Kulja viloyatida Oq-Qiya, Sariq-Buloq va Qora-Qo‘chqor qishloqlaridagi uylarning hovlilarini suv bosgani haqida xabar berdi.

Avvalroq 8-may kuni kuchli yomg‘irdan keyin yuzaga kelgan toshqinlar mazkur qishloqlarda yo‘llar va ariqlarni to‘ldirgan edi. Sel Mirzake — Qora-Kulja —Alayku yo‘linining bir qismiga ham ta’sir qilgan.

Voqea joyida politsiya xodimlari, qutqaruvchilar va o‘t o‘chiruvchilar, jami 50 dan ortiq kishi ish olib bormoqda. Favqulodda vaziyatlar vazirligining xabar berishicha, Mirzake — Qora-Kulja — Alayku yo‘li allaqachon ochilgan. Zarar yetgan qishloqlarni tozalash ishlari olib borilmoqda.