Yevro—2020. Yengilmas Italiya “bankirlar”ga, golga tashna turklar “ajdarlar”ga qarshi. Rossiya esa debyutant bilan o‘ynaydi

Yevro—2020 musobaqasining ikkinchi tur o‘yinlariga 16-iyun, chorshanba kuni start beriladi. Musobaqa debyutanti Finlyandiya soat 18:00 da Rossiya bilan o‘ynasa, 21:00 da Turkiya Uels bilan o‘zaro bahs olib boradi. Kunning markaziy o‘yinida Italiya Shveysariya bilan hisob-kitob qiladi. A guruhidan joy olgan ushbu o‘yin 00:00 da boshlanadi.

Italiya

Kimdir Italiyani to‘xtata oladimi? Hech bo‘lmasa gol uradigan jamoa topilar?

Shveysariyaga qarshi o‘yin oldidan Italiyaning mag‘lubiyatsiz seriyasi yana bittaga ko‘paydi. “Skuadra adzzura” 28 o‘yindan buyon (rasmiy va o‘rtoqlik o‘yinlari bilan birga hisoblaganda) mag‘lubiyat nimaligini bilmay kelyapti. Manchini jamoasining oxirgi mag‘lubiyati 2018-yil sentabr oyida yuz bergandi. Shundan buyon italyanlar 23 ta g‘alabani qo‘lga kiritdi. Gollar nisbati esa: 77:7. Shunchaki dahshat! Italiya oxirgi 9 o‘yindan buyon umuman gol o‘tqazmasdan g‘alaba qozonib kelyapti.

“Olimpiko” stadioni bilan bog‘liq tarix alohida ahamiyatga ega. Italiya bu stadionda mundial va Yevropa chempionati o‘yinlarining birortasida mag‘lubiyatga uchramagan (7 g‘alaba, 2 durang).

Verratti jarohatidan to‘liq tuzalmagan, Florensi yo‘q. Manchini qanday tarkibni maydonga tushiradi?

A guruhida Italiya raqiblaridan bir bosh ustun, qolgan 3 ta jamoa deyarli bir xil darajada. Manchini guruh bosqichidayoq rotatsiyani amalga oshirish imkoniga ega. Ikkinchi tur o‘yinida Alessandro Florensi maydonga tusha olmaydi. Jarohat olgan futbolchining o‘rnini Jovanni di Lorenso egallaydi.

Marko Verratti qaydnomadan joy olgan. Lekin uning maydonga tushish ehtimoli kam. O‘ng qanot hujum chizig‘ida ham o‘zgarish bo‘lishi mumkin, Turkiyaga qarshi o‘yinda Domeniko Berardi kichik jarohat olgan, uning ustiga futbolchi ishonchsiz harakat qildi. Berardining o‘rniga katta ehtimol bilan Federiko Kyeza tushadi.

Shveysariya

Shveysariya birinchi turda durang natija qayd etdi, lekin o‘ziga bo‘lgan ishonch yuqori

Uelsga qarshi uchrashuvda shveysariyaliklar g‘alabaga raqibidan ko‘ra ko‘proq yaqin keldi. Vladimir Petkovich shogirdlari raqib darvozasi oldida juda ko‘p vaziyatlarni yaratdi, lekin yakunlovchi zarbani beradigan futbolchi topilmadi. Shveysariya 1-turda uelsliklardan ko‘ra yaxshiroq o‘ynadi. Ammo durang natija qayd etildi.

Seferovich Turkiyaga qarshi o‘yinda ishonchli harakat qilmadi. Lekin Petkovich tavakkal qilib Gavranovichni tushirarmikan?

Shveysariya 1-turda Denni Uord darvozasi oldida osonlikcha xavfli vaziyatlarni yaratdi. Ayniqsa, Haris Seferovichda 3 ta ajoyib vaziyat bo‘ldi. Lekin u imkoniyatlardan foydalana olmadi.

Hujum chizig‘ida o‘zgarish bo‘larmikan? Seferovich vaziyatlarni ko‘kka sovuryapti. Uning o‘rniga tushishi mumkin bo‘lgan Mario Gavranovich esa oxirgi o‘yinlarda juda ko‘p xatolarga yo‘l qo‘ymoqda. Bosh murabbiy Petkovich oldida jiddiy muammo turibdi.

Murabbiylar fikrlari:

Shveysariyaga qarshi o‘yin juda muhim, biz raqiblarni hurmat qilamiz. Ayniqsa, hujumda ular juda xavfli. O‘yin taqdirini hal qila oladigan hujumchilarga ega. 1-turdan farqli ravishda tarkibda bir nechta futbolchini almashtirishim mumkin. Tarkib o‘zgarsa ham kuchimiz o‘zgarmasligini ko‘rdingiz. Italiya hamon Yevroning yetakchi jamoalaridan biri.Roberto Manchini, Italiya terma jamoasi bosh murabbiyi

Oradan 8 yil o‘tib “Olimpiko” stadioniga tashrif buyurdim. Rim — juda ajoyib shahar. O‘yinga butun diqqatimizni qaratamiz. Italiyani yutish sirlari yo‘q. Biz 90 daqiqa diqqatni jamlagan holda o‘ynashimiz lozim.

Vladimir Petkovich, Shveysariya terma jamoasi bosh murabbiyi

Italiya: Janluiji Donnarumma; Jovanni di Lorenso, Leonardo Bonuchchi, Jorjio Kyellini, Leonardo Spinatssola; Manuel Lokatelli, Jorjinyo, Nikolo Barella; Federiko Kyeza, Lorenso Insinye, Chiro Immobile.

Shveysariya: Ivon Mvogo; Kevin Mbabu, Niko Elvedi, Manuel Akanji, Fabian Sher, Rikardo Rodriges; Remo Froyler, Granit Jaka, Jerdan Shakiri; Bril Embolo, Haris Seferovich.

Jamoalarning oxirgi 5 o‘yini statistikasi: 

Daniyani yenggan finlar Rossiyadan ham ochko olishga urinib ko‘radi

Rossiya birinchi turda Belgiyaga qarshi o‘yinda hech narsa qila olmadi. Yirik hisobdagi mag‘lubiyatdan so‘ng ruslar guruhning autsayderiga aylanib qoldi. Finnlar esa Daniya ustidan sensatsion g‘alabaga erishdi. Bu o‘yinda Rossiyaga ochko suv va havodek zarur bo‘lsa, Finlyandiya birinchi turdagi ruhiyatni tushirmaslik uchun ham harakat qiladi.

Jamoalarning oxirgi 5 o‘yini statistikasi:

Gol urish ilinjidagi turklar britaniyalik “ajdarlar”ga qarshi

Italiyaga qarshi o‘yindagi yirik mag‘lubiyatdan so‘ng turklar iloji boricha gol urishga harakat qilishi zarur. Uelsga qarshi o‘yin ahamiyati juda yuqori. Uelsliklar esa Yevro—2016 dagi yurishini takrorlashi kutilgandi. Ammo birinchi o‘yin ko‘rsatib berdiki, jamoaga bu safar oson bo‘lmaydi. Beyl bekorga futbol butsasini golf oyoq kiyimiga almashtirish harakatida emas ekan. Garetning har beshta harakatidan faqat bittasi omadli chiqdi. U jamoasini ortidan yetaklay olmadi. Ikkinchi turda esa vaziyatni to‘g‘rilash uchun imkoniyat bor.

Jamoalarning oxirgi 5 o‘yini statistikasi: