Dunyo va o‘zbek sportiga oid 16-iyun tongining muhim xabarlari dayjesti bilan tanishing.
O‘zbekiston va futbol
Xayr, JCh—2022!
O‘zbekiston terma jamoasi JCh—2022 va Osiyo Kubogi—2023 qo‘shma saralashi doirasidagi so‘nggi tur o‘yinida Saudiya Arabistoniga qarshi bahs olib bordi. Unda Vadim Abramov jamoasi 0:3 hisobida mag‘lub bo‘lib, hal qiluvchi bosqich yo‘llanmasidan quruq qoldi.
Eng yaxshi ikkinchi o‘rinlar orasida O‘zbekiston faqat Iordaniyadan oldin bo‘ldi. Tojikiston terma jamoasi ham Abramov shogirdlarini ortda qoldirdi. Ummon, Vyetnam va Livan kabi jamoalar esa 3-saralash bosqichida ishtirok etadi.
Abramov o‘yindan o‘z fikrlarini bildirib o‘tar ekan, futbolchilarni ruhiy tomondan tayyorlay olmagani xatosi ekanini aytdi va muxlislardan uzr so‘radi.
Xullas, mundial orzusi yana kamida 4 yil kechiktirildi.
Jahon
Superliga g‘oyasidan voz kechmayotgan ta’sischilarga jazo qo‘llanilmaydi
“Real”, “Barselona” va “Yuventus” 2021/22-yilgi mavsumda Chempionlar Ligasida ishtirok etadi. Uchala jamoa ham ushbu qaror yozilgan xatni UEFAdan qabul qilib olgan.
Avvalroq ushbu klublar Superliga g‘oyasidan hamon voz kechmagani sabab jazoga tortilishi va Yevrokuboklardan chetlatilishi mumkinligi aytilgandi. Keyinchalik ta’sischilar UEFAni sudga bergandi.
Yevro—2020 haqida
Portugaliya terma jamoasi 1-turda Vengriya bilan bahs olib bordi. Asabiy ruhda kechgan bahsda portugallar o‘yin oxiriga borib, raqib darvozasini uch marta ishg‘ol qildi.
Krishtianu Ronaldudan rekordlar. Ronaldu 5-marta Yevropa chempionatida qatnashmoqda. Bu musobaqa rekordi hisoblanadi. U ilk bor Yevro—2004 da debyut qilgan va shundan beri muntazam turnirda qatnashib kelmoqda.
Bu o‘yinda Ronaldu Yevro tarixidagi 10 va 11-gollarini urdi. Bu ham musobaqa rekordi hisoblanadi. Bunga qadar eng yaxshi natija Mishel Platiniga tegishli bo‘lib, fransiyalik sobiq futbolchi 9 ta gol urgandi.
1-turdan keyin Ronaldu Romelu Lukaku va Patrik Shik bilan birgalikda (2 tadan gol) to‘purarlar ro‘yxatida yetakchi bo‘lib turibdi.
Musobaqaning markaziy o‘yinida Fransiya va Germaniya terma jamoalari o‘zaro to‘qnash keldi. Unda fransuzlar Mats Hummelsning avtogoli evaziga g‘alabani qo‘lga kiritdi. Shu tariqa Germaniya Yevro tarixida ilk bor musobaqani mag‘lubiyat bilan boshladi. Bunga qadar jamoa 1-tur o‘yinlarida 7 ta g‘alaba va 5 ta durang qayd etgandi.
“Barselona” 2021/22-yilgi mavsum uchun asosiy libosni namoyish qildi. U an’anaviy ko‘k-anorrangdan iborat bo‘ladi.
Morata “Yuventus”da qoladi
Ispaniyalik hujumchi Alvaro Morata yana bir mavsum Turin klubi safida qoladi. “Yuventus” futbolchining ijara shartnomasini yana bir mavsumga uzaytirdi. Uning transfer huquqi “Atletiko”ga tegishli.
Olich “SSKA”ni tark etdi
Aprel oyida Moskvaning “SSKA” klubi bosh murabbiyiga aylangan Ivitsa Olich “armiyachilar” boshqaruvini tark etdi. Mutaxassis qo‘l ostida jamoa 9 o‘yinda 4 ta g‘alaba, 4 ta mag‘lubiyat va bitta durang qayd etdi. Jamoa RPLni 6-o‘rinda yakunlab, 20 yil deganda ilk bor Yevrokuboklarsiz qoldi.
Ronaldu Coca-Cola’ga 4 milliard dollar zarar keltirdimi?
Krishtianu Ronaldu matbuot anjumani vaqtida Coca-Cola ichimligini chetga surib qo‘ydi. Shundan so‘ng ko‘plab nufuzli nashrlar, xususan, Marca portugaliyalik futbolchining bu ishi kompaniyaning aksiyalariga ta’sir qilgani va ularning narxi 1,6 foizga pasayganini xabar qildi. Nashrga ko‘ra, kompaniya 242 mlrd dollardan 238 milliardga arzonlagan.
Biroq bu tahlillar xato ekani va Coca-Cola aksiyalarining arzonlashishiga boshqa holatlar sabab bo‘lgani ma’lum bo‘ldi. Ya’ni aksiyalar narxi dushanba kuni juma kundagiga nisbatan pastroq bo‘lishi oldindan kutilgan va hodisa Ronalduga oid video chiqmasidan avval ro‘y berib bo‘lgan. Shu tariqa Yevro tarixidagi eng yaxshi o‘yinchining bu harakati Coca-Cola aksiyalari narxiga zarracha ta’sir qilmagan.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)