Dunyo va o‘zbek sportiga oid 15-iyun tongining muhim xabarlari dayjesti bilan tanishing.
O‘zbekiston
FutbolO‘zbekiston terma jamoasi uchun hal qiluvchi kun
Osiyo mintaqasida 15-iyun kuni JCh—2022 va Osiyo Kubogi—2023 qo‘shma saralashi ikkinchi bosqichining so‘nggi tur o‘yinlari bo‘lib o‘tadi. O‘zbekiston terma jamoasi hal qiluvchi bahsda Saudiya Arabistoniga qarshi o‘ynaydi. Bu o‘yinda Vadim Abramov shogirdlarini g‘alaba keyingi bosqichga olib chiqadi. Durang yoki mag‘lubiyat qayd etiladigan bo‘lsa, O‘zbekistonning taqdiri boshqa guruhlardagi o‘yinlarga bog‘liq bo‘lib qoladi.
Uchrashuv Toshkent vaqti bilan 23:00 da boshlanadi.
“Spartak”ga zarar keltirayotgan Oston O‘runov
“Spartak” klubi xo‘jayini Leonid Fedunning turmush o‘rtog‘i, moskvaliklar direktorlar kengashining sobiq vakili Zarema Salixova o‘zbekistonlik futbolchi Oston O‘runovning transferi ham unga sarflangan pulni qoplay olmasligini aytdi.
“O‘runovni sotsa ham “Spartak” zarardan qutula olmaydi. Hech kim bilan kelishilmagan ko‘tarma puli 321 ming yevroni tashkil qilgan, qo‘shimchasiga maosh. Maoshning katta qismi dastlabki 4 oylikda to‘lab berilgan.
“Ufa” ijara uchun qolgan 10—15% maoshni to‘ladi, xolos. Foydali ish koeffitsiyenti — nol. “Foydali menejer” (Shamil Gazizov nazarda tutilmoqda — izoh “Daryo”)”, — deydi Zarema.
Jahon
FutbolIspaniya terma jamoasi Yevro—2020 1-turida Shvetsiyaning mag‘lub etolmadi. Ispanlar bu o‘yinning 85,1% qismida to‘pga egalik qildi. Bu Yevropa chempionati uchun rekord natija hisoblanadi.
Mazkur o‘yinda ispanlar safida maydonga tushgan Pedri Rodriges Ispaniya terma jamoasining Yevro tarixidagi eng yosh futbolchisiga aylandi (18 yosh-u 201 kun). U Fransesk Fabregasning (19 yosh-u 41 kun) rekordini yangiladi.
Ushbu guruhning ikkinchi o‘yinida Polsha kutilmaganda Slovakiyaga yutqazib qo‘ydi (1:2). Slovaklarning dastlabki goli polshaliklar darvozabon Voytsex Shchesni hisobiga yozildi. Bu Yevro tarixida darvozabon ijrosida amalga oshirilgan ilk avtogol bo‘ldi. Shuningdek, bu o‘yinda Yevro—2020 dagi dastlabki qizil kartochka ham ko‘rsatildi. Polsha yarim himoyachisi Gjegoj Krixovyak ikkinchi bo‘limda maydondan chetlatildi.
Yana Yevro haqida
15-iyun kuni 1-turning so‘nggi o‘yinlari o‘tkaziladi. “O‘lim guruhi” deb nom olgan F guruhida Portugaliya terma jamoasi Vengriyaga qarshi maydonga tushsa, Fransiya va Germaniya turning markaziy o‘yinida o‘zaro to‘qnash keladi.
Messidan navbatdagi rekord
Argentina terma jamoasi Kopa Amerika—2021 dastlabki turida Chili bilan durang o‘ynadi. Uchrashuvda argentinaliklarning yagona golini Lionel Messi urdi. Bu Leo uchun Argentinaning rasmiy o‘yinlaridagi 39-gol bo‘ldi. Shu tariqa Messi bu borda Gabriel Batistutaning rekordini yangiladi.
Argentina safida 145-o‘yinini o‘tkazgan Messi uchun bu umumiy hisobda 73-gol bo‘ldi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)