“Xalqaro tadbirlarda O‘zbekiston vakillari foydalanadigan ashyolar nufuzga loyiq darajada bo‘lishi shart”. Mudofaa vazirligi “15 mln so‘mlik ruchkalar” xaridi bo‘yicha izoh berdi

Ijtimoiy tarmoqlar va internet saytlarida Mudofaa vazirligi tomonidan 30 million so‘mga ikki dona ruchka xarid qilinishi rejalashtirilganiga oid xabar keng muhokamalarga sabab bo‘ldi. Shu munosabat bilan vazirlik “Daryo”ga izoh berdi.

“Ma’lumki, keyingi yillarda O‘zbekiston Respublikasi va xorijiy davlatlar o‘rtasida harbiy va harbiy-texnik sohalardagi hamkorlik rivojlanib, aloqalar tobora kengayib bormoqda. O‘z o‘rnida ushbu hamkorlik asosini mustahkamlash borasida bir qator me’yoriy-huquqiy hujjatlar imzolanyapti.

Ayni paytda O‘zbekiston Mudofaa vazirligi va xorijiy davlatlar mudofaa idoralari bilan o‘zaro hamkorlik bitimlari haqidagi muhim hujjatlarni imzolash rasmiy tadbirlarida foydalanib kelingan kanselyariya jihozlarini yangilashga ehtiyoj paydo bo‘lgan va ularning foydalanish muddati yakuniga yetmoqda.

Shu bois kelgusida O‘zbekiston Respublikasi Mudofaa vazirligi rahbariyati ishtirokidagi xorijlik hamkorlar bilan amalga oshiriladigan protokol tadbirlarini yuqori saviyada tashkillashtirish va Mudofaa vazirligi nufuzini saqlash maqsadida istiqbolda xalqaro miqyosdagi taniqli firmalarning kanselyariya ashyolaridan foydalanish rejalashtirilgan. Ya’ni xalqaro tadbirlarda O‘zbekiston Respublikasi rasmiy vakillari tomonidan foydalanish uchun qo‘llaniladigan ashyolar xalqaro nufuzga loyiq darajada bo‘lishi shart, deya hisoblanadi.

Shu maqsadda mazkur turdagi mahsulotlarni yetkazib beruvchi mahalliy tadbirkorlarning takliflarini o‘rganish uchun vazirlik ishlar boshqarmasi tomonidan O‘zbekiston Respublikasi Tovar-xomashyo birjasining maxsus axborot portali exarid.uzex.uz saytiga ruchka xarid qilinishi haqidagi e’lon joylashtirildi”, – deyiladi vazirlik izohida.

Vazirlik xabarida qayd etilishicha, e’londa ko‘rsatilgan narx yakuniy to‘xtam emas, balki bozor qoidalariga ko‘ra tadbirkorlik va mahsulot yetkazib berish bilan shug‘ullanadigan korxona va tashkilotlarning mahsulot va narxlar bo‘yicha barcha takliflari o‘rganiladi, tanlov asosida yakuniy xulosaga kelinadi. Xuddi shunday talablarga javob bera oladigan boshqa firmalarga tegishli mahsulotlar taklifi ham o‘rganib chiqiladi.

“Ijtimoiy tarmoq faollari va davlatimiz budjeti sarfiga befarq bo‘lmagan barcha yurtdoshlarimiz bilishini istardikki, ushbu mahsulot vazirlikning budjetdan tashqari mablag‘lari hisobidan xarid qilinishi ko‘zda tutilgan.

Qo‘shimcha ma’lumot sifatida: bugungi kunda Mudofaa vazirligi tasarrufidagi harbiy qism, muassasa va bo‘linmalar qoshida xo‘jalik hisobida faoliyat yurituvchi ishlab chiqarish korxonalari hamda yordamchi xo‘jaliklar (issiqxona, baliqchilik, asalarichilik, chorvachilik, bog‘dorchilik, ekin maydonlari) mavjud bo‘lib, ular vazirlikning budjetdan tashqari mablag‘larini shakllantiradigan asosiy manbalar hisoblanadi”, – deyiladi rasmiy izoh yakunida.