Oliy Majlis Senatining 12-mart kuni bo‘lib o‘tgan o‘n uchinchi yalpi majlisida senatorlar tomonidan “Davlat xaridlari to‘g‘risida”gi qonun muhokama qilindi.

Foto: Senat matbuot xizmati

Ta’kidlanishicha, mazkur qonunning maqsadi davlat xaridlari sohasidagi munosabatlarni tartibga solishga qaratilgan ochiq va shaffof, samarali va yaxlit tizimni yaratishdan iboratdir.

Muhokama jarayonida amaldagi qonunning ijrosi borasidagi mavjud bo‘shliq va muammolarga ham e’tibor qaratildi.

Jumladan, xaridlar aksariyat qismining ochiqlik va shaffoflikni ta’minlovchi axborot-kommunikatsiya tizimidan foydalanmagan holda amalga oshirilishi, xarid qilish tartibini nazorat qilish tizimining bugungi talabga javob bermasligi hamda davlat xaridlari sohasidagi hujjatlarga rioya etmaslik holatlariga yo‘l qo‘yishning ko‘payishi kabi kamchiliklar uchrayotganligi ta’kidlandi.

Natijada birgina 2019-yilda 729 ta holatda 2 trillion 908 milliard 100 million so‘mlik shartnomalarning buyurtmachilar tomonidan berilgan buyurtmalar bo‘yicha tender savdolari o‘tkazilmasdan bitimlar tuzilishiga yo‘l qo‘yilgan.

Foto: Senat matbuot xizmati

Bu kabi kamchiliklarga barham berish maqsadida ko‘rib chiqilgan qonun:

  • davlat xaridlariga yo‘naltiriladigan budjet mablag‘lari va boshqa markazlashgan manbalarni maqsadli ishlatish;
  • hukumatning kafolatlangan kredit resurslaridan samarali foydalanishni ta’minlash;
  • davlat sektorini zarur tovar, ish va xizmatlar bilan ta’minlashda qisqa muddatlarda narx-sifat ko‘rsatkichlarini uyg‘unlashtirish;
  • korrupsiyaga qarshi kurashishda samarali natijalarga erishish kabi dolzarb masalalar yechimida muhim o‘rin tutadi.

Ta’kidlanishicha, qonunning hayotga tatbiq etilishi amalda bir-biriga zid bo‘lgan qonunchilik talablariga barham beribgina qolmay, xaridlar shaffofligini ta’minlash bilan birga tadbirkorlik subyektlari va aholi uchun ham qulaylik yaratadi. Qonun senatorlar tomonidan ma’qullandi.