Toshkentda 2021-yilning o‘tgan 5 oyi davomida “Toshshahartransxizmat” AJ haydovchilari tomonidan jami 35 ta YTH sodir etilgan. Bu haqda AOKAda bo‘lib o‘tgan brifingda jamiyat matbuot kotibi Azimjon Mahamadjonov ma’lum qildi, deb xabar bermoqda “Gazeta.uz”.
Ta’kidlanishicha, mazkur YTHlar oqibatida bir kishi vafot etgan, yana 40 nafar fuqaro turli darajadagi tan jarohatlari olgan.
Mazkur YTHlarning 21 tasi yoki 60 foizi avtobus saloni ichida yo‘lovchi yiqilishi yoki tan jarohati olishi bilan bog‘liq hodisalarni tashkil etgan.
“Bunga asosiy sabab avtobus oldida harakatga boshqa transportlarning siqib qo‘yishi yoki tormozni bosish oqibatida yiqilish yuzaga kelgan”, — degan Mahamadjonov.
Shuningdek, jami YTHlarning 14 tasi yoki 40 foizi ish staji 5 yilgacha yoki undan kam bo‘lgan haydovchilar tomonidan sodir etilgani aytilgan.
Eslatib o‘tamiz, 27-may kuni Toshkentning Yakkasaroy tumanida Isuzu avtobusi bilan to‘qnashgan Nexia haydovchisi voqea joyida halok bo‘lgandi. 31-may kuni Toshkent halqa yo‘li va Bunyodkor shohko‘chalari kesishmasidagi aylanma ko‘prik ustida ikki avtobus ishtirokida sodir bo‘lgan yo‘l-transport hodisasi oqibatida bir kishi halok bo‘lgandi.
Izoh (0)