27-may kuni Toshkent shahrining Yakkasaroy tumanida sodir bo‘lgan yo‘l-transport hodisasi oqibatida bir kishi halok bo‘ldi. Bu haqda Toshkent shahar IIBB axborot xizmati xabar berdi.
Foto: Toshkent shahar IIBB axborot xizmati
Ma’lum qilinishicha, soat 14:55 larda tumanning Bobur ko‘chasida 53 yoshli haydovchi boshqaruvidagi Nexia avtomobili X.F. ismli 48 yoshli fuqaro boshqarib ketayotgan Isuzu avtobusi bilan yo‘l-transport hodisasini sodir etgan.
YTH natijasida yengil avtomobil haydovchisi voqea joyida vafot etgan.
Bundan tashqari, shu kunning o‘zida soat 21:30 lar atrofida Yashnobod tumani Qorasuv ko‘chasida Matiz haydovchisi piyodani urib yuborgan.
Foto: Toshkent shahar IIBB axborot xizmati
Avariya oqibatida Namangan viloyatida 1979-yilda tug‘ilgan Ya.L. olgan tan jarohatlari bilan tibbiyot muassasasiga joylashtirilgan. Biroq tibbiyot xodimlarining sa’y-harakatlariga qaramasdan piyoda vafot etgan.
Mazkur holatlar yuzasidan Toshkent shahar IIBB Tergov boshqarmasi tomonidan Jinoyat kodeksining 266-moddasi (transport vositalari harakati yoki ulardan foydalanish xavfsizligi qoidalarini buzish) 2-qismi alomatlari bilan jinoyat ishi qo‘zg‘atilgan. Tergov harakatlari olib borilmoqda.
Avvalroq Samarqandda uxlab qolgan Cobalt haydovchisi o‘zidan oldingi “KamAZ”ga urilishi oqibatida ikki yo‘lovchi vafot etgani, Buxoroda o‘zidan oldingi mashinani quvib o‘tmoqchi bo‘lgan Nexia haydovchisi qarshisidan kelayotgan yuk mashinasiga urilishi oqibatida halok bo‘lgani to‘g‘risida xabar berilgandi.
