Favqulodda vaziyatlar vazirligi ijtimoiy tarmoqlarda tarqalgan Surxondaryo viloyatining Sariosiyo tumanidagi kasalxonalarning biriga suv toshib kirgani tasvirlangan videoga munosabat bildirdi.
Ma’lum qilinishicha, mazkur holat vazirlik tomonidan o‘rganilganda tumandagi “Afrosiyob” MFY hududida joylashgan sil kasalliklar dispanseri yonidan oqib o‘tuvchi ariqqa o‘z sig‘imidan ortiq darajada suv kelgani bois, toshib chiqqan suv atrofdagi shifoxonaning hovlisiga kirgan.
Ushbu hodisa yuzasidan viloyat Favqulodda vaziyatlar boshqarmasi xodimlari voqea joyiga yetib kelib, motopompalar yordamida suvni tortib chiqargan.
“Kelgusida bu kabi holat takrorlanmasligi uchun mutasaddilar tomonidan zaruriy choralar ko‘rilmoqda”, — deyiladi xabarda.
Eslatib o‘tamiz, may oyining boshlarida Andijonda kuchli sel kelishi oqibatida ikki bola suvda oqib ketib, halok bo‘lgan, Jomboyda suv quvuri yorilishi oqibatida xalqaro yo‘lning bir qismi o‘pirilib tushgan, Samarqandda kuchli yomg‘ir sababli Damas soyga tushib ketgani to‘g‘risida xabar berilgandi.
Izoh (0)