Фавқулодда вазиятлар вазирлиги ижтимоий тармоқларда тарқалган Сурхондарё вилоятининг Сариосиё туманидаги касалхоналарнинг бирига сув тошиб киргани тасвирланган видеога муносабат билдирди.
Маълум қилинишича, мазкур ҳолат вазирлик томонидан ўрганилганда тумандаги «Афросиёб» МФЙ ҳудудида жойлашган сил касалликлар диспансери ёнидан оқиб ўтувчи ариққа ўз сиғимидан ортиқ даражада сув келгани боис, тошиб чиққан сув атрофдаги шифохонанинг ҳовлисига кирган.
Ушбу ҳодиса юзасидан вилоят Фавқулодда вазиятлар бошқармаси ходимлари воқеа жойига етиб келиб, мотопомпалар ёрдамида сувни тортиб чиқарган.
«Келгусида бу каби ҳолат такрорланмаслиги учун мутасаддилар томонидан зарурий чоралар кўрилмоқда», — дейилади хабарда.
Эслатиб ўтамиз, май ойининг бошларида Андижонда кучли сел келиши оқибатида икки бола сувда оқиб кетиб, ҳалок бўлган, Жомбойда сув қувури ёрилиши оқибатида халқаро йўлнинг бир қисми ўпирилиб тушган, Самарқандда кучли ёмғир сабабли Damas сойга тушиб кетгани тўғрисида хабар берилганди.
Изоҳ (0)