Самарқанд ва Самарқанд вилоятининг бошқа бир қатор туманлари аҳолиси сув таъминотидаги узилишларга дуч келмоқда. «Самарқанд сув таъминоти» корхонаси «бу йилги табиий қурғоқчилик» ҳақида хабар берди.
Самарқанд вилояти аҳолисининг тоза ичимлик суви таъминоти ерости сув захиралари ҳисобидан «Самарқанд сув таъминоти» корхонасига қарашли сув иншоотлари томонидан амалга оширилади. «Самарқанд сув таъминоти» маълумотларига кўра, ҳозирда ёғингарчиликларнинг йўқлиги ва Зарафшон дарёси ўзанида сув оқимининг камлиги сабабли ерости сувларининг сатҳи (дебити) пастлашиб кетган.
Натижада иншоотлардаги насос ускуналарининг мўътадил ишлашида ерости суви захирасининг етишмаслиги сабабли Самарқанд, Каттақўрғон шаҳарлари, Пастдарғом, Нуробод, Иштихон, Каттақўрғон, Пахтачи, Нарпай, Пайариқ ва Оқдарё туманлари аҳолисини тоза ичимлик суви таъминотида узилишларни олиб келмоқда.
« ‘Самарқанд сув таъминоти’ МЧЖ маъмурияти марказлашган ичимлик суви истеъмолчиларидан 2021 йилнинг табиий қурғоқчилиги сабабли сув таъминотида кузатилаётган камчиликлар — сув етишмовчилиги учун ўзининг узрини билдиради ва мазкур муаммо тез орада ўз ечимини топади. Шу билан бирга, корхона маъмурияти истеъмолчилардан ичимлик сувидан мақсадли фойдаланиш, уни беҳуда исрофгарчиликларига йўл қўймасликларини сўрайди», — дейилади хабарда.
Эслатиб ўтамиз, 2021 йилнинг февраль ойи охирида Президент йиғилишида 2021 йилги суғориш мавсумида сув таъминоти 25 фоизга пастроқ бўлиши маълум қилинган эди. 1 октябргача сувни тежайдиган технологиялар учун полиэтилен ва полипропилендан олинадиган бож бекор қилинди. 10 миллиард кубометр сувни тежаш масъулияти бош вазир ўринбосари Шуҳрат Ғаниев, сув хўжалиги вазирлиги раҳбари ва ҳокимларга юклатилган эди.
Аввалроқ Президент Шавкат Мирзиёев Тошкент вилоятига ташрифи чоғида ҳудуддаги экин ерларини суғориш учун Чорвоқ сув омборидан сув таъминоти чекланишини таъкидлаган. «Сизларга фақат Чорвоқни очиб берса. Канал сувга тўлса, кейин 24 соат сув оқади. Сиз ҳаттоки икки соат ҳам сувни назорат қилмайсиз», — деган эди Президент ҳокимларга юзланиб.2020 йилнинг 10 июлида эса Президентнинг «Ўзбекистон Республикаси сув хўжалигини ривожлантиришнинг 2020—2030 йилларга мўлжалланган концепциясини тасдиқлаш тўғрисида»ги фармони имзоланганди.
Изоҳ (0)