Ички ишлар вазирлиги ахборот хизмати ижтимоий тармоқларда «Бозорлардан бирида аёл киши бир неча эркак томонидан аёвсиз таҳқирланди» номи остида тарқалган видеотасвир юзасидан баёнот берди.
Маълум қилинишича, 2021 йил 5 июнь куни Янгиқўрғон туманида яшовчи, спиртли ичимликка ружу қўйган ва жанжалкаш шахс сифатида туман ИИБнинг профилактик ҳисобида турувчи Г.Т. исмли аёл Чортоқ туманига маст ҳолда бориб, шаҳар автошоҳ бекатида ҳеч қандай сабабсиз жанжал кўтарган ва ҳудуддаги дўкон ҳамда бошқа объектларнинг ойналарини синдириб, дўконларга зиён, ўзига эса тан жароҳати етказган.
Шу ерда ишловчи сомсапазнинг идишларини ҳам синдириб ташлагандан сўнг 1988 йилда туғилган сомсапаз Х.Ю. аёлга бу ердан кетишини тушунтирган, бироқ аёл спиртли ичимлик талаб қилиб, жанжал кўтаришда давом этган.
Шундан сўнг Х.Ю. аёлнинг сочидан тортиб, уни бекатдан ташқарига олиб чиқиш учун судраган.
ИИВ ахборот хизмати хабарига кўра, ҳозирда ҳолат юзасидан терговга қадар текширув ҳаракатлари олиб борилмоқда. Фуқаро Х.Ю. эса вақтинча маъмурий тартибда ушланган.
«Суриштирув ишлари якунига етгач, ҳолат юзасидан қўшимча маълумот берилади», — дейилади хабарда.
Аввалроқ Сурхондарёда уй масаласида қўшни аёлни калтаклаган эркак жаримага тортилгани, Чироқчида номаълум шахс ҳокимлик биноси олдида бир қизни калтаклагани тўғрисида хабар берилганди.
Изоҳ (0)