Андижонда TikTok учун ИИБ ходимининг хизмат машинасини ҳайдаган «мойкачи» ушланди

Андижонда TikTok учун ИИБ ходимининг хизмат машинасини ҳайдаган 19 ёшли «мойкачи»га чора кўрилди, деб  хабар беради ИИВ ЙҲХББ ахборот хизмати.

Ижтимоий тармоқларда «Сиз мабодо тиктокчи эмасмисиз?» сарлавҳаси остида видео тарқалди. Унда «автомойка» ишчиси ЙҲХБ ходимининг хизмат автомобилида «мигалка»ни ёққан ҳолда ҳаракатлангани тасвирланган.

Маълум қилинишича, 6 июнь куни Андижон вилояти Марҳамат тумани ИИБ ЙҲХБ катта инспектори О.Каримов тушлик вақтида Lacetti русумли махсус хизмат машинасини ювдириб олиш учун идора биноси яқинида жойлашган автомобилларни ювиш шохобчасига олиб кирган.

Автомашиналарни ювиш билан шуғулланувчи 2002 йилда туғилган фуқаро Н.А. хизмат автомобилини шохобча ҳудудида бошқариб, уни видеога олган ва TikTok’га жойлаштирган.

Ҳолат ўрганилиб, ЙҲХБ катта инспектори О.Каримов ва фуқаро Н.А.га нисбатан Маъмурий Жавобгарлик тўғрисидаги кодекснинг 135-моддаси (йўл ҳаракати қоидаларида назарда тутилган ҳужжатлари бўлмаган шахсларнинг транспорт воситаларини бошқариши) 2-қисми тартибида баённома тузилган ва БҲМнинг 5 баравари (1,225 минг сўм) миқдорида жарима белгиланган.

Аввалроқ Тошкентда ички ишлар ходими кийимини кийиб, машина капоти устида видеога тушган йигит ва унинг шериги 5 суткага, Сирдарёда эса ички ишлар ходими кийимида рақсга тушган йигит 8 суткага қамалгани тўғрисида хабар берилди.