Davlat statistika qo‘mitasi ma’lumotlariga ko‘ra, O‘zbekistonda sement importi keskin oshdi.
Ma’lum qilinishicha, 2021-yilning yanvar—aprel oylarida xorijdan O‘zbekistonga qiymati 50,5 million dollarlik 1 million tonna sement import qilingan. Bu ko‘rsatkich o‘tgan yilning mos davri bilan solishtirilganda 515,1 ming tonnaga ko‘p.
Mamlakatga sement asosan Qozog‘iston (498,3 ming tonna), Qirg‘iziston (278,5 ming tonna) va Tojikiston (234,7 ming tonna) davlatlaridan olib kirilgan.
Import nima sababdan o‘sdi?
Mart oyida hukumat sement importiga o‘rnatilgan 30 foizli bojxona bojini bekor qildi. Imtiyoz 1-oktabrga qadar amalda bo‘ladi.
Bojning nol qiymatga tushirilishi qurilish materiallari narxining oshib ketishining oldini olishga xizmat qiladi. Yaqin oylarda o‘tgan yilgiga nisbatan qurilish ortishi kutilmoqda.
Eslatib o‘tamiz, mart boshida uy-joy qurilishi va ipoteka bozorini rivojlantirishga bag‘ishlangan yig‘ilishda bosh vazirning birinchi o‘rinbosari Ochilboy Ramatov Prezidentdan korxonalarga sement va metallni ishlab chiqaruvchilardan to‘g‘ridan to‘g‘ri sotib olishga ruxsat so‘ragan. U o‘z taklifini 2021-yilda qurilish ishlari hajmi ikki barobarga oshishi, qurilish materiallariga bo‘lgan talab esa narxning oshishiga olib kelishi bilan asoslagan. Shavkat Mirziyoyev taklifni yaxshilab o‘rganib chiqish va shaffof tizim yaratish zarurligini ta’kidlagan.
Izoh (0)