Qashqadaryo viloyatining Shahrisabz shahrida hokim Akrom Sulaymonov topshirig‘iga ko‘ra, jamoatchilik tartibini saqlash bahonasida hokim qabuliga kelgan murojaatchi ayol — Nodira O‘rinovaning bir kun asab-ruhiy kasalliklar shifoxonasiga tiqib qo‘yilgani haqida xabar berilgandi. Mazkur maqolaga munosabat bildirgan hokimlik axborot xizmati vaziyatni o‘rganib chiqqan ishchi guruh ma’lumotlariga tayanib, murojaatchi ayolni noshukur deb atadi va uning shaxsiy hayotiga doir axborotlarni jamoatchilikka oshkor qildi.
“2013-yilning 16-martida Nodiraning (Nodira O‘rinova — tah.) akasi Rayim, onasi O‘rinova Ashiroylar qizini shifoxona sharoitida yotqizib davolatishda amaliy yordam so‘rab, murojaat qilgan. Murojaat sababi O‘rinova Nodira muntazam ravishda uydagilari bilan janjal qilib, akasi Rayimning farzandini quduqqa tashlamoqchi bo‘lgan va o‘z joniga qasd qilishga uringan”, — deyiladi hokimlik axborot xizmatining rasmiy Telegram-kanalida.
“Nodira O‘rinova 1997-yildan beri asab-ruhiy kasalliklar shifoxonasida ... xastaligi bilan ro‘yxatga olingan”, — deya yozadi hokimlik axborot xizmati. Nodira O‘rinovaning qaysi xastalikdan davolanayotganini ham yozib, hokimlik axborot xizmati bemor hayotiga doir sir saqlanishi lozim bo‘lgan ma’lumotni ommaga oshkor qilgan.
Hokimlik axborot xizmatining yozishicha, shahar hokimi Akrom Sulaymonov murojaatchi Nodira O‘rinova haqida gapirib, u har safar qabulga kirib, qabul tartibini buzishga harakat qilishini aytgan.
“Videomurojaatda Nodira O‘rinova shu yilning 5-aprel kuni Kitob tumanidagi viloyat 2-sonli asab-ruhiy kasalliklar dispanseriga shahar hokimligi tomonidan majburiy olib kelinganligini bildirgandi. Hokim qabuliga kelgan Nodira O‘rinova har oy qabulga kirib, qabul tartibini buzishga harakat qilganligini aytdi. So‘nggi marta ham xuddi shunday jarayon yuzaga kelgan”, — deb yozadi shahar hokimligi axborot xizmati.
Shahrisabz shahar hokimligi axborot xizmati Nodira O‘rinovaga 2018-yil hokimlik tomonidan gilam, 2019-yil Mahalla va oilani qo‘llab-quvvatlash boshqarmasi tomonidan konditsioner, 2020-yil esa homiylar tomonidan pul mukofoti berilganini ma’lum qilib, “jamiyatimizda bunday noshukur, norozi insonlarning ong-u shuuriga ma’naviyat va ma’rifat orqali ta’sirchan choralarni amalga oshirish lozim deb hisoblaymiz”, deya fikr bildiradi.
Eslatib o‘tamiz, Nodira O‘rinovaning asab-ruhiy kasalliklar shifoxonasiga majburiy tartibda olib borilib, bir kun ushlab turilganini nafaqat shahar hokimi Akrom Sulaymonov, “Do‘stlik” mahallasi raisi Farruh Iskanov hamda “uchastkavoy” Zohid Amirqulovlar ham tasdiqlagandi. Shunday ekan, Nodira O‘rinova bilan bog‘liq vaziyatni o‘rganib chiqqan ishchi guruh uning majburiy tartibda shifoxonaga olib borilishi va bir kun ushlab turilishiga e’tibor qaratib, javobgarlik masalasini oydinlashtiruvchi ma’lumotlarni huquqni muhofaza qiluvchi tashkilotlarga yuborsa, maqsadga muvofiq bo‘lardi.
Izoh (0)