Qozog‘iston prezidenti Qosim-Jo‘mart To‘qayev O‘zbekiston bosh vaziri Abdulla Aripovni qabul qildi. Bu haqda Qozog‘iston prezidenti matbuot xizmati xabar qildi.
Uchrashuvda qo‘shni davlat rahbari ikki tomonlama hamkorlikning hozirgi holatiga ijobiy baho berdi.
“Biz birinchi navbatda birodar qo‘shni O‘zbekiston bilan hamkorlikni rivojlantirishga e’tibor qaratamiz, buni Markaziy Osiyo mintaqasida barqarorlik va xavfsizlikni ta’minlashning juda muhim omili deb bilamiz”, – deb ta’kidlagan Qozog‘iston prezidenti.
Qosim-Jo‘mart To‘qayevning ma’lum qilishicha, bugungi kunda islohotlarni tizimli ravishda amalga oshirayotgan O‘zbekiston ko‘plab sohalarda yutuqlarga erishmoqda. Qozog‘iston strategik sherik va ittifoqdosh bo‘lgan O‘zbekistonning yutuqlaridan chin dildan mamnun.
O‘z navbatida O‘zbekiston bosh vaziri Abdulla Aripov uchrashuv uchun minnatdorlik bildirib, O‘zbekiston Prezidenti Shavkat Mirziyoyevning salomi va ezgu tilaklarini yetkazdi.
Qozog‘iston rahbari hukumatlar ish sur’atini pasaytirmasliklari, koronavirus pandemiyasidan keyingi davrda davlatlar o‘rtasida savdo-iqtisodiy aloqalarni o‘rnatish uchun mavjud bo‘lgan barcha imkoniyatlardan foydalanish muhimligini qo‘shimcha qildi.
Uchrashuv yakunida Qozog‘iston prezidenti Abdulla Aripovni ikki mamlakat o‘rtasidagi aloqalarni har tomonlama mustahkamlash, o‘zaro aloqalarni rivojlantirishda qo‘shgan xizmatlari uchun II darajali “Do‘stlik” ordeni bilan taqdirladi.
Ushbu orden Qozog‘istonning oliy davlat mukofoti bo‘lib, chet el davlatlari fuqarolariga ikki tomonlama munosabatlarni rivojlantirish, xalqlar o‘rtasida tinchlik, do‘stlik va hamkorlikni mustahkamlashga qo‘shgan hissasi uchun beriladi.
Bundan avval 60 yoshga to‘lgan O‘zbekiston bosh vaziri Abdulla Aripov “Fidokorona xizmatlari uchun” ordeni bilan mukofotlangani hamda Abdulla Aripov Minsk shahrida bo‘lib o‘tadigan MDH hukumat rahbarlari kengashining yig‘ilishida ishtirok etishi haqida xabar berilgandi.
Izoh (0)