O‘zbekiston hududiga 3—7-iyunda Eron hududlaridan issiq havo kirib kelishining kuchayishi hisobiga harorat yanada ko‘tarilishi kutilmoqda, deb xabar berdi “O‘zgidromet”.
Qayd etilishicha, ushbu kunlarda havo harorati iqlimiy me’yorlardan 7-10 darajaga yuqori bo‘ladi. Kunduz kunlari havo 40-43 darajagacha, janubda va cho‘l hududlarida ba’zi joylarda 44-46 darajagacha isiydi.
Respublika bo‘yicha ba’zi joylarda shamol changli bo‘ron bilan 17-22 metr/sekundgacha kuchayishi mumkin.
Eslatib o‘tamiz, 1-iyun kuni O‘zbekiston hududlarida ob-havo keskin o‘zgarib, joylarda kuchli shamol, qum bo‘ronlari qayd etilgandi. 29-mayda Farg‘ona tumani Vodil hududlarida kuchli shamol va chang bo‘ronlari kuzatilgandi. Shu kuni Toshkentda bir soatdan ortiq davom etgan kuchli shamol chang bo‘ronlarini keltirib chiqarib, Buxorodan kelayotgan charter reys Toshkentga qo‘nolmadi.
Bundan avval “O‘zgidromet” 3-iyun kuni qanday ob-havo kutilayotganini ma’lum qilgandi.
Mavzuga doir: O‘zbekistonda 31-maydagi harorat mutlaq maksimumga yetdi
Izoh (0)