Agar SARS-CoV-2 koronavirusining kelib chiqish sababini tushunmasak, kelajakda insoniyat yangi pandemiyaga duch kelishi mumkin. Bu haqda Texasdagi bolalar shifoxonasi Vaksinalarni ishlab chiqarish markazining hamraisi Piter Xotez aytib o‘tdi.
“Hozirgi pandemiya uchinchisi. Ona tabiat bizni kelgusida nima yuz berishi haqida ogohlantirmoqda: agar COVID-19’ning kelib chiqishini to‘liq anglamasak, oldinda COVID-26 va COVID-32 epidemiyasi ham paydo bo‘ladi”, — dedi u.
Xotezning fikriga ko‘ra, COVID-19 kelib chiqishi bo‘yicha to‘g‘ridan to‘g‘ri Xitoyning Uxan shahrida tekshiruv o‘tkazish kerak.
Olimning so‘zlariga ko‘ra, dastlabki ikkita global epidemiya sifatida SARS atipik pnevmoniyasi (2000-yil boshlaridagi) va Yaqin Sharqdagi MERS respirator sindromining (birinchi marta 2012-yilda xabar qilingan) tarqalishini olish mumkin.
Avvalroq Microsoft asoschisi va sobiq rahbari Bill Geyts yangi pandemiyaning boshlanish muddatini taxmin qilgan edi. Shuningdek, u Yevropa Ittifoqi va AQShning pandemiya boshida yo‘l qo‘ygan eng katta xatosi hamda pandemiyadan keyin insoniyat duch keladigan ikkita xavf haqida gapirgan.
Eslatib o‘tamiz, AQSh va Buyuk Britaniya 28-may kuni Jahon sog‘liqni saqlash tashkiloti (JSST)ni Xitoyda koronavirusning kelib chiqishi ustida chuqurroq tadqiqotlar olib borishga chaqirdi.
Izoh (0)