O‘yin olamidagi Gucci virtual sumkasi uning haqiqiy muqobilidan qimmatroqqa — 4115 dollarga sotildi. Real sumkani esa 3400 dollarga xarid qilish mumkin, deb xabar beradi Esquire.
Roblox geym-platformasida 17—31-may kunlari Gucci virtual mahsulotlarining onlayn ko‘rgazmasi bo‘lib o‘tmoqda. Ko‘rgazma doirasida geymerlar Robux o‘yin ichi valyutasi hisobiga xaridlarni amalga oshirishi mumkin. Foydalanuvchilardan biri asalari tasviri tushirilgan sumkani 475 Robux’ga (taxminan 5,5 dollarga) sotib oldi. Keyin esa uni o‘yin ichidagi auksion orqali 350 ming Robux’ga (4115 dollar) sotishga muvaffaq bo‘ldi.
Ushbu sumka NFT formatidagi predmet emas va uni Roblox platformasidan yana biror joyga eksport qilib bo‘lmaydi, ya’ni u faqat o‘yin ichidagi predmet hisoblanadi.
Avvalroq Gucci virtual krossovkalarni sotuvga chiqargani to‘g‘risida xabar berilgandi. Ularni mobil ilova orqali “kiyib ko‘rish” va xarid qilish mumkin.
Izoh (0)