Mart oxirida Suvaysh kanaliga tiqilib qolib, kanalni olti kunga to‘sib qo‘ygan Ever Given konteyner kemasi kapitani hodisada aybdor deb topildi. Bu haqda kanal ma’muriyati rahbari Usama Rabiga tayanib, “RBK” xabar berdi.
Foto: Reuters
Rabining ta’kidlashicha, tergov kapitanning boshqaruvda xatoga yo‘l qo‘ygani, bu esa konteyner kemasini kanal bo‘ylab burilib ketishiga va sayozlikka o‘tirib qolishiga sabab bo‘lganini isbotladi.
Himoya taraf aybning bir qismi Suvaysh kanali ma’muriyatining lotsmanlariga (yo‘l boshlovchi) tegishli bo‘lishi mumkinligiga ishora qildi. Biroq Rabi ushbu mutaxassislarning harakatga oid ko‘rsatmalari tavsiya xususiyatiga ega, yakuniy qarorni faqat kapitan qabul qiladi, deya da’vo qilmoqda.
Rabi yomon havoda katta kemaning kanaldan o‘tishiga imkon bergani uchun voqeada ma’muriyat aybdor, degan da’volarni qabul qilib bo‘lmasligini ta’kidladi. “Yuk tashish hatto yomon ob-havo sharoitida ham odatdagidek davom etadi, buni kanalda Ever Given’dan oldin 12 ta kemaning o‘tib ketgani tasdiqlaydi”, — deyiladi xabarda.
Shuningdek, Rabi kema egasi bilan muzokaralar chog‘ida Suvaysh kanali ma’muriyati voqea uchun tovon puli miqdorini deyarli 40 foizga — 916 million dollardan 550 million dollargacha kamaytirishga rozi bo‘lganini aytdi. Uning so‘zlariga ko‘ra, 200 million dollar garov sifatida naqd pulda, qolgan qismi esa kafolat xatlari bo‘yicha bank to‘lovlari shaklida to‘lanishi kerak.
Eslatib o‘tamiz, 23-mart kuni Ever Given kemasi kuchli shamol va qum bo‘roni tufayli yo‘nalishini o‘zgartirib, burun va quyruq qismlari bilan ikkala qirg‘oqqa tiralib qolib, Suvaysh kanalining bir magistralli janubiy qismini to‘sib qo‘ygan edi. Buning natijasida 450 dan ortiq kemadan iborat tirbandlik yuzaga kelgan. Shuningdek, hodisa ortidan neft narxi keskin o‘sgan.
Suvaysh kanali orqali ikki yo‘nalishda ham kemalar harakati 29-mart, dushanba oqshomidan qayta tiklandi.
Avvalroq Suvaysh kanalining to‘silib qolishi oqibatida yetgan zarar 1 milliard dollarga baholangani haqida xabar berilgandi. Kanal ma’muriyati bo‘lib o‘tgan hodisada Ever Given kemasi kapitanini aybdor deb atadi. Kemaning egasi esa ishni sudga oshirmaslik uchun zararni qoplab bermoqchiligini ma’lum qildi.
