Yevropaning top-ligalari qatorida Angliya chempionatida ham 2020/21-yilgi mavsum yakunlandi. “Daryo” Premyer Liganing ortda qolgan mavsumi qisqacha tahlilini taqdim etadi.
“Manchester Siti”ning kambeki, cho‘qqidan qulagan “Liverpul”
Mavsum avvalida “Manchester Siti” va “Liverpul” chempionlik uchun asosiy da’vogarlar sifatida e’tirof etilayotgandi. Biroq mavsum startida har ikki jamoa ham ishonchni oqlamadi. O‘tgan mavsum katta farq bilan chempionlikni tantana qilgan “qizillar” startdayoq Virjil van Deykni yo‘qotdi. Shundan so‘ng jamoada jarohatlar epidemiyasi boshlandi. Yurgen Klopp mavsum davomida markaziy himoyada 20 xildan ortiq juftlikni o‘ynatgani bunga yaqqol misol.
“Shaharliklar” esa dekabr o‘rtalariga qadar juda beqaror o‘yin ko‘rsatdi. Mavsum avvalidagi 12 o‘yinda Gvardiola jamoasi 5 g‘alaba, 5 durang va ikkita mag‘lubiyat qayd etdi. Shundan keyin “Siti” ketma-ket g‘alabalarni qatorlashtirdi, toki mart oyi boshida “Manchester Yunayted” to‘xtatmagunga qadar. Shundan keyin faqat Marselo Byelsaning “Lids”i “Manchester Siti”ni to‘xtata oldi. Chempionlik masalasi deyarli hal bo‘lgan paytda “Chelsi”ga qarshi kechgan bahs va chempion sifatida “Brayton” bilan o‘yindagi mag‘lubiyatlarni hisobga olmaganda, albatta. “Manchester Siti” Rojdestvo vaqtida 8-o‘rinda bo‘lib, yakunda APL chempionligini qo‘lga kiritgan tarixdagi ilk jamoa bo‘ldi.
Yevrokuboklar uchun “qonli” kurash va omadsiz “Lester”
Mavsumning yakuniy pallasida Premyer Ligada so‘nggi yillardan beri kuzatilmagan holat yuz berdi. Mavsum tugashiga 3-4 tur qolganda chempiondan tashqari ligani tark etadigan klublar nomi ham ma’lum bo‘lishga ulgurdi. Intriga faqat Yevropa Chempionlar Ligasi va qolgan Yevrokuboklar yo‘llanmasi uchun kurashda qoldi.
“Lester” xuddi o‘tgan mavsumda bo‘lgani kabi bu safar ham so‘nggi pallada bo‘shashdi va buning to‘lovi qimmatga tushdi. So‘nggi turda jamoa Konferensiyalar Ligasi uchun kurashayotgan “Tottenhem”ga qarshi o‘ynashi va bu o‘yinda ochko olishi shart edi. O‘yin davomida “tulkilar” hisobda oldinda borishga ham muvaffaq bo‘ldi, biroq Garet Beylning dubli “shporlar”ga g‘alaba keltirdi. Raqobatchi “Chelsi” esa parallel o‘yinda yutqazgan bo‘lishiga qaramay to‘rtinchi o‘rinni saqlab qoldi va Chempionlar Ligasi yo‘llanmasini APL orqali hal qildi. “Lester” uchun bu qanchalik alamli bo‘lganini bir fakt bilan tasvirlash mumkin: jamoa 242 kun davomida APL top-4 ligida yurdi, yakunda 5-o‘rinni oldi.
London klublarining kutilgan va kutilmagan natijalari
Bu London klublari uchun juda qiyin mavsum bo‘ldi. Frenk Lempard (“Chelsi”) va Joze Mourinyo (“Tottenhem”) kabi mutaxassislar mavsum o‘rtasida iste’foga chiqarilganining o‘zi ko‘p savollarga javob bera oladi. “Arsenal” rahbariyati hamshaharlaridan ko‘ra sabrliroq bo‘ldi, so‘nggi 15 yillikdagi eng yomon ko‘rsatkichga qaramay Mikel Artetani olib qoldi.Ma’lum vaqt davomida Londonning eng yaxshi jamoasi “Vest Hem” bo‘lib turdi. Devid Moyes jamoasining natijalari mavsumning o‘ziga xos sensatsiyasi bo‘ldi. “Bolg‘achilar” top-4 likdan ikki ochkolik farq bilan ortda qolib, 6-o‘rinni qo‘lga kiritdi va haqli ravishda Yevropa Ligasi yo‘llanmasiga ega bo‘ldi. “Vest Hem”ning bu natijalarida “Manchester Yunayted”dan ijaraga olingan Jessi Lingardning xizmatlari beqiyos bo‘ldi. Futbolchi ketma-ket ikki bor APLda oyning eng yaxshi o‘yinchisi bo‘lishga ulgurdi.
Mavsum “Chelsi” uchun “amerikacha attraksion”ga o‘xshash bo‘ldi. Startni u qadar yomon o‘tkazmagan “ko‘klar” keyinchalik bir tekisda o‘yin namoyish qila olmay qoldi. Qishda jamoaning ketma-ket qoniqarsiz natijalari Lempardning iste’fosiga sabab bo‘ldi. Tomas Tuxelning kelishi esa jamoani qayta jonlantirdi. Chempionlar Ligasidagi muvaffaqiyatdan tashqari jamoa APLda kuchli to‘rtlikka kira oldi. Biroq mavsumning so‘nggi pallalarini “Chelsi” juda yomon o‘tkazdi. Oldinda “aristokratlar”ni yana bitta muhim o‘yin kutmoqda — jamoa Chempionlar Ligasi finalida “Manchester Siti” bilan kuch sinashadi.
“Arsenal” haqida gapiradigan bo‘lsak, Arsen Venger davrida top-6 likdan quyiga tushmagan jamoa ketma-ket ikkinchi mavsum 8-o‘rinni oldi. Shuningdek, jamoa 1995/96-yilgi mavsumdan beri ilk bor Yevrokuboklarsiz qoldi.APL 2020/21-yilgi mavsum yakunlari
“Manchester Siti”, “Manchester Yunayted”, “Liverpul” va “Chelsi” Chempionlar Ligasi yo‘llanmasiga ega bo‘ldi. “Lester” va “Vest Hem” Yevropa Ligasida o‘ynaydi, “Tottenhem” esa Konferensiyalar Ligasida ishtirok etadi. “Fulhem”, “Vest Bromvich” va “Sheffild Yunayted” ligani tark etdi.
Faktlar, statistika va raqamlar
- “Manchester Siti” Premyer Ligada ketma-ket 12 ta safar o‘yinida g‘alaba qozondi. Bu Angliyaning yuqori to‘rt divizioni uchun rekord natija hisoblanadi;
- “Lester” 2020/21-yilgi mavsumda 242 kun APL top-4 ligida yurib, yakunda 5-o‘rinni oldi. 2019/20-yilgi mavsumda ham jamoa kuchli to‘rtlikda 325 kun mobaynida turgan va oxirda 5-o‘rinni olgan;
- Harri Keyn APL bir mavsumida eng yaxshi to‘purar va eng yaxshi assistent bo‘lgan Endi Kouldan keyin tarixdagi ikkinchi o‘yinchi bo‘ldi;
- Serxio Aguero “Manchester Siti”da APLdagi 184-golini urdi va bitta klub safida eng ko‘p gol urish borasida Ueyn Runining (183) rekordini yangiladi;
- “Manchester Yunayted” 2020/21-yilgi mavsum safar o‘yinlarida yutqazmadi;
Mavsum qahramonlari
- Eng yaxshi o‘yinchi: Brunu Fernandesh (“Manchester Yunayted”);
- Eng yaxshi murabbiy: Pep Gvardiola (“Manchester Siti”);
- Eng yaxshi yosh o‘yinchi: Fil Foden (“Manchester Siti”);
- Eng yaxshi transfer: Jessi Lingard (“Manchester Yunayted”dan “Vest Hem”ga);
- Mavsum omadsizi: Joze Mourinyo (“Tottenhem” sobiq ustozi).
Mavsum ramziy terma jamoasi:
Darvozabon: Ederson (“Manchester Siti”);
Himoyachilar: Lyuk Shou (“Manchester Yunayted”), Ruden Diash, Jon Stounz, Joau Kanselu (barchasi – “Manchester Siti”), ;
Yarimhimoyachilar: Ilkay Gundo‘g‘an, Kevin de Bryuyne (ikkisi “Manchester Siti”), Brunu Fernandesh (“Manchester Yunayted”);
Hujumchilar: Muhammad Saloh (“Liverpul”), Meyson Maunt (“Chelsi”), Harri Keyn (“Tottenhem”).
Muallif: Nodirxon Hamidxonov
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)