Европанинг топ-лигалари қаторида Англия чемпионатида ҳам 2020/21 йилги мавсум якунланди. «Дарё» Премьер Лиганинг ортда қолган мавсуми қисқача таҳлилини тақдим этади.
«Манчестер Сити»нинг камбэки, чўққидан қулаган «Ливерпуль»
Мавсум аввалида «Манчестер Сити» ва «Ливерпуль» чемпионлик учун асосий даъвогарлар сифатида эътироф этилаётганди. Бироқ мавсум стартида ҳар икки жамоа ҳам ишончни оқламади. Ўтган мавсум катта фарқ билан чемпионликни тантана қилган «қизиллар» стартдаёқ Виржил ван Дейкни йўқотди. Шундан сўнг жамоада жароҳатлар эпидемияси бошланди. Юрген Клопп мавсум давомида марказий ҳимояда 20 хилдан ортиқ жуфтликни ўйнатгани бунга яққол мисол.
«Шаҳарликлар» эса декабрь ўрталарига қадар жуда беқарор ўйин кўрсатди. Мавсум аввалидаги 12 ўйинда Гвардиола жамоаси 5 ғалаба, 5 дуранг ва иккита мағлубият қайд этди. Шундан кейин «Сити» кетма-кет ғалабаларни қаторлаштирди, токи март ойи бошида «Манчестер Юнайтед» тўхтатмагунга қадар. Шундан кейин фақат Марсело Бьелсанинг «Лидс»и «Манчестер Сити»ни тўхтата олди. Чемпионлик масаласи деярли ҳал бўлган пайтда «Челси»га қарши кечган баҳс ва чемпион сифатида «Брайтон» билан ўйиндаги мағлубиятларни ҳисобга олмаганда, албатта. «Манчестер Сити» Рождество вақтида 8-ўринда бўлиб, якунда АПЛ чемпионлигини қўлга киритган тарихдаги илк жамоа бўлди.
Еврокубоклар учун «қонли» кураш ва омадсиз «Лестер»
Мавсумнинг якуний палласида Премьер Лигада сўнгги йиллардан бери кузатилмаган ҳолат юз берди. Мавсум тугашига 3-4 тур қолганда чемпиондан ташқари лигани тарк этадиган клублар номи ҳам маълум бўлишга улгурди. Интрига фақат Европа Чемпионлар Лигаси ва қолган Еврокубоклар йўлланмаси учун курашда қолди.
«Лестер» худди ўтган мавсумда бўлгани каби бу сафар ҳам сўнгги паллада бўшашди ва бунинг тўлови қимматга тушди. Сўнгги турда жамоа Конференциялар Лигаси учун курашаётган «Тоттенҳэм»га қарши ўйнаши ва бу ўйинда очко олиши шарт эди. Ўйин давомида «тулкилар» ҳисобда олдинда боришга ҳам муваффақ бўлди, бироқ Гарет Бэйлнинг дубли «шпорлар»га ғалаба келтирди. Рақобатчи «Челси» эса параллел ўйинда ютқазган бўлишига қарамай тўртинчи ўринни сақлаб қолди ва Чемпионлар Лигаси йўлланмасини АПЛ орқали ҳал қилди. «Лестер» учун бу қанчалик аламли бўлганини бир факт билан тасвирлаш мумкин: жамоа 242 кун давомида АПЛ топ-4 лигида юрди, якунда 5-ўринни олди.
Лондон клубларининг кутилган ва кутилмаган натижалари
Бу Лондон клублари учун жуда қийин мавсум бўлди. Фрэнк Лэмпард («Челси») ва Жозе Моуриньо («Тоттенҳэм») каби мутахассислар мавсум ўртасида истеъфога чиқарилганининг ўзи кўп саволларга жавоб бера олади. «Арсенал» раҳбарияти ҳамшаҳарларидан кўра сабрлироқ бўлди, сўнгги 15 йилликдаги энг ёмон кўрсаткичга қарамай Микель Артетани олиб қолди.Маълум вақт давомида Лондоннинг энг яхши жамоаси «Вест Ҳэм» бўлиб турди. Дэвид Моес жамоасининг натижалари мавсумнинг ўзига хос сенсацияси бўлди. «Болғачилар» топ-4 ликдан икки очколик фарқ билан ортда қолиб, 6-ўринни қўлга киритди ва ҳақли равишда Европа Лигаси йўлланмасига эга бўлди. «Вест Ҳэм»нинг бу натижаларида «Манчестер Юнайтед»дан ижарага олинган Жесси Лингарднинг хизматлари беқиёс бўлди. Футболчи кетма-кет икки бор АПЛда ойнинг энг яхши ўйинчиси бўлишга улгурди.
Мавсум «Челси» учун «америкача аттракцион»га ўхшаш бўлди. Стартни у қадар ёмон ўтказмаган «кўклар» кейинчалик бир текисда ўйин намойиш қила олмай қолди. Қишда жамоанинг кетма-кет қониқарсиз натижалари Лэмпарднинг истеъфосига сабаб бўлди. Томас Тухелнинг келиши эса жамоани қайта жонлантирди. Чемпионлар Лигасидаги муваффақиятдан ташқари жамоа АПЛда кучли тўртликка кира олди. Бироқ мавсумнинг сўнгги паллаларини «Челси» жуда ёмон ўтказди. Олдинда «аристократлар»ни яна битта муҳим ўйин кутмоқда — жамоа Чемпионлар Лигаси финалида «Манчестер Сити» билан куч синашади.
«Арсенал» ҳақида гапирадиган бўлсак, Арсен Венгер даврида топ-6 ликдан қуйига тушмаган жамоа кетма-кет иккинчи мавсум 8-ўринни олди. Шунингдек, жамоа 1995/96 йилги мавсумдан бери илк бор Еврокубокларсиз қолди.АПЛ 2020/21 йилги мавсум якунлари
«Манчестер Сити», «Манчестер Юнайтед», «Ливерпуль» ва «Челси» Чемпионлар Лигаси йўлланмасига эга бўлди. «Лестер» ва «Вест Ҳэм» Европа Лигасида ўйнайди, «Тоттенҳэм» эса Конференциялар Лигасида иштирок этади. «Фулҳэм», «Вест Бромвич» ва «Шеффилд Юнайтед» лигани тарк этди.
Фактлар, статистика ва рақамлар
- «Манчестер Сити» Премьер Лигада кетма-кет 12 та сафар ўйинида ғалаба қозонди. Бу Англиянинг юқори тўрт дивизиони учун рекорд натижа ҳисобланади;
- «Лестер» 2020/21 йилги мавсумда 242 кун АПЛ топ-4 лигида юриб, якунда 5-ўринни олди. 2019/20 йилги мавсумда ҳам жамоа кучли тўртликда 325 кун мобайнида турган ва охирда 5-ўринни олган;
- Ҳарри Кейн АПЛ бир мавсумида энг яхши тўпурар ва энг яхши ассистент бўлган Энди Коулдан кейин тарихдаги иккинчи ўйинчи бўлди;
- Серхио Агуэро «Манчестер Сити»да АПЛдаги 184-голини урди ва битта клуб сафида энг кўп гол уриш борасида Уэйн Рунининг (183) рекордини янгилади;
- «Манчестер Юнайтед» 2020/21 йилги мавсум сафар ўйинларида ютқазмади;
Мавсум қаҳрамонлари
- Энг яхши ўйинчи: Бруну Фернандеш («Манчестер Юнайтед»);
- Энг яхши мураббий: Пеп Гвардиола («Манчестер Сити»);
- Энг яхши ёш ўйинчи: Фил Фоден («Манчестер Сити»);
- Энг яхши трансфер: Жесси Лингард («Манчестер Юнайтед»дан «Вест Ҳэм»га);
- Мавсум омадсизи: Жозе Моуриньо («Тоттенҳэм» собиқ устози).
Мавсум рамзий терма жамоаси:
Дарвозабон: Эдерсон («Манчестер Сити»);
Ҳимоячилар: Люк Шоу («Манчестер Юнайтед»), Руден Диаш, Жон Стоунз, Жоау Канселу (барчаси – «Манчестер Сити»), ;
Яримҳимоячилар: Илкай Гундўған, Кевин де Брюйне (иккиси «Манчестер Сити»), Бруну Фернандеш («Манчестер Юнайтед»);
Ҳужумчилар: Муҳаммад Салоҳ («Ливерпуль»), Мэйсон Маунт («Челси»), Ҳарри Кейн («Тоттенҳэм»).
Муаллиф: Нодирхон Ҳамидхонов
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)