Алишер Саъдуллаев Ўзбекистоннинг 14 та ҳудудида волонтёрлар мактаби очилишини маълум қилди

Ёшлар ишлари агентлиги директори Алишер Саъдуллаев 25 май, сешанба куни «Тошкент 5 ташаббус ҳаракати» ёшлар фестивали доирасида ўтказилган учрашувда Ўзбекистонда волонтёрлар мактаби очилишини қайд этди. Бу ҳақда «Дарё» мухбири хабар бермоқда.

«Дунё бўйича статистик маълумотларга назар ташлаганимизда волонтёрлик тажрибасига эга бўлган ходимлар яхши иш топишлари эҳтимоли юқори эканлигини кўрдик. Яна бир қизиқ факт: агар иш жойларида чеклов мавжуд бўлса, улар волонтёрлик тажрибасига эга кишини танлашади. Чунки ушбу жараёнда қатнашиш давомида мутахассислар ҳаётий кўникмаларни эгаллайдилар — алоқага киришиш, муросага келиш, вазиятни ҳис қилиш қобилияти ривожланади.

Ёрдам берганларнинг ҳаммаси ҳам омма олдида кўриниш беришни ёқтираверишмайди. Волонтёрларга уларнинг маданият даражасини ошириш учун билим бериш керак. Волонтёрлик Ўзбекистонда янги тушунча эмас, фақат илгари уни бошқача номлашган. Биз Ўзбекистон волонтёрлар ассоциацияси билан биргаликда волонтёрлар мактабини очишга қарор қилдик. Бу нима учун керак? Гап шундаки, волонтёрлик — ҳамма билиши керак бўлган муҳим аҳамиятга эга йўналиш. Чет мамлакатларда волонтёрлар маълум йўналишни, ёш ёки дин танламайдилар. Бу муҳим умуминсоний ҳаракат, жамиятнинг муҳим элементи, шунинг учун улар учун майдон яратиш керак», — деди Саъдуллаев.

Унинг таъкидлашича, айни пайтда университетлар ҳузурида 30 та волонтёрлар марказини яратиш муҳокама қилинмоқда.

«Юртимиз бўйлаб 14 та ҳудудда волонтёрлар мактаблари очилади. Ҳар бир минтақада улар учун моддий-техник база билан жиҳозланган алоҳида офис бўлади. Шунингдек, волонтёрлар марказларини очиш таклифи ҳам мавжуд. Ҳозирда университетлар ҳузурида 30 та шундай марказни яратиш муҳокама қилинмоқда. Бу талабалар бўш вақтида, дарслар оралиғи ёки якунида йиғилишиб, ўзларининг лойиҳаларини муҳокама қилишлари учун хизмат қилади», — деди Ёшлар ишлари агентлиги директори.