Тошкент вилояти Қибрай туманидаги қулупнай даласида ишлаган деҳқонларга вайрон қилинган ҳосил учун 20 май куни товон пули тўлаб берилди. Бу ҳақда вилоят ҳокимлиги матбуот хизмати «Gazeta.uz»га маълум қилди.
Аввалроқ «Чинкелди» маҳалласида бульдозер қулупнай экилган 8 гектар ер йўқ қилингани хабар берилган эди. Туман ҳокимлиги бу ер майдонлари «Янги Ўзбекистон» боғи, «Истиқлол» мажмуаси ва бошқа объектларни қуриш учун давлат эҳтиёжлари учун олинганини маълум қилганди.
Туман ҳокимлиги янги боғни барпо этиш ҳақида кўрсатма бергач, деҳқонларга огоҳлантириш хатлари юборилганини, улар билан келишувлар имзоланиб, келтирилган зарарни қоплаш бўйича далолатномалар расмийлаштирилганини билдирганди.
Туман ҳокимлиги қишлоқ хўжалиги масалалари бўлими бошлиғининг ўринбосари Ҳамидулла Тўрахўжаевнинг «Kun.uz»га маълум қилишича, дастлабки келишув фермерлар билан ҳам, деҳқонлар билан ҳам тузилган.
«Фермер хўжалигида 20,2 гектар ер майдони мавжуд. Шу ер майдонидан 12 гектар боғи бор, ўша боғнинг оралиғига 8 гектар қулупнай экилган. Давлат эҳтиёжига олишда фермер билан келишилган эди. Деҳқонлар ҳам бўшатиб беришга рози бўлишди. Ўшанда терилмаган қулупнай учун бир гектарига 50 миллион сўм, ярмидан ўтган, яъни терилган майдонлар учун гектарига камида 24 миллион сўм товон пули тўлашга келишилди», — деган у.
Ҳамидулла Тўрахўжаевнинг таъкидлашича, ушбу ер майдонида 9 нафар деҳқон қулупнай экиб деҳқончилик қилган.
«Биз далолатномалар тузилиб, қийматни чиқариш учун экспертизага берилгани, нархлаш ишлари якунланиб тасдиқлангач, ҳужжатлар молия бўлимига тақдим этилиши ҳамда товон пуллари тўланишини айтганимизда тўғри тушунишганди», — дея ойдинлик киритган Ҳамидулла Тўрахўжаев. Унинг сўзларига кўра, орадан 4-5 кун ўтгач, деҳқонларда ишончсизлик пайдо бўлиб, тўламаяпсизлар, деган маънода шундай йўл тутган. Шунингдек, тарқалган видеода картошка экилган майдон бузилаётган, боғ ораларига экилган қулупнайзорлар олдинроқ бузилганини билдирган.
Ҳокимлик мутасаддисининг айтишича, 20,2 гектар майдонидаги боғ ва экинлар учун жами 850 миллион сўм товон пули тўлаш назарда тутилмоқда. Якуний рақам экспертиза хулосасидан сўнг аниқ бўлади. Қулупнай майдони учун ажратилган 192 миллион сўм ҳам шу сумманинг ичида. Бугунги кунда уларга жами 154 миллион сўм товон пуллари тўланди.
Қибрай туман ҳокимлигининг «Gazeta.uz»га маълум қилишича, деҳқонлар қолган қулупнай ҳосили учун 1 гектарга 20 миллион сўм тўловга рози бўлган. Улардан қулупнай экини учун қилинган харажатлари қоплангани, эътирозлари йўқлиги ҳақида тилхатлар олинган.
Товон пули олган деҳқонлар фермер хўжалиги ер майдонига, шунингдек, седана, ловия, картошка уруғи ҳам қадалганини билдирган. Ҳамидулла Тўрахўжаев экилган бошқа экинлар учун товон пуллари баҳолаш экспертизаси ўтказилгач, яна тўланишини билдирган.
Изоҳ (0)