Ўзбекистон Президентининг фуқаролар ҳуқуқларини ҳимоя қилиш ва мурожаатлар билан ишлаш масалалари бўйича маслаҳатчиси, фавқулодда вазиятлар вазири вазифасини бажарувчи Турсинхон Худойберганов «Ўзбекистон Республикасида хизмат кўрсатган ёшлар мураббийи» фахрий унвони билан тақдирланди. Бу ҳақда вазирлик матбуот хизмати хабар берди.
«Ушбу унвон давлат органлари ва ҳуқуқ-тартибот идораларидаги кўп йиллик самарали меҳнати, мамлакатимиз мустақиллигини мустаҳкамлаш, юртимизда олиб борилаётган кенг кўламли ислоҳотларни муваффақиятли амалга ошириш, ҳудудларни комплекс ривожлантириш ишларига қўшган муносиб ҳиссаси, халқ билан очиқ мулоқотни йўлга қўйиш, муаммоларни жойида бартараф этиш, фуқароларнинг ҳуқуқ ва эркинликлари, қонуний манфаатларини рўёбга чиқариш борасидаги катта хизматлари, ёш авлодни она Ватанга муҳаббат руҳида тарбиялаш, мард ва жасур, ўз бурчига садоқатли кадрларни тайёрлаш йўлидаги ибратли фаолияти ҳамда таваллудининг 70 йиллиги муносабати билан берилди», — дейилади хабарда.
Турсинхон Худойберганов 1951 йилнинг 20 май санасида Тошкентда туғилган. Маълумоти — олий, 1974 йилда Низомий номидаги Тошкент педагогика институтини, 1982 йилда Тошкент милиция мактабини тамомлаган. 2018 йилдан буён фавқулодда вазиятлар вазири вазифасини бажарувчи, 2020 йилдан Олий Мажлис Сенати аъзоси ҳисобланади.
Изоҳ (0)