“Nasaf” klubi bosh murabbiyi Ro‘ziqul Berdiyev OFK Kubogi 3-turi doirasida “Oltin Asr”ga qarshi kechadigan bahs oldidan o‘z fikrlari bilan o‘rtoqlashdi, deya xabar qilmoqda “Championat.asia”.
Bu biz uchun ham, raqib uchun ham muhim va hal qiluvchi bahs. “Oltin Asr” — jiddiy va tajribali jamoa, qiyin o‘yinga tayyorgarlik ko‘ryapmiz. Hal qiluvchi bahsga barchamiz tayyormiz. Muxlislarni xursand qiladigan natija qayd etishga harakat qilamiz.“Nasaf” va “Oltin Asr” jamoalari o‘rtasidagi o‘yin 20-may kuni O‘zbekiston vaqti bilan 17:00 da boshlanadi.“Nasaf”ni durang ham qoniqtirishi haqida
Yigitlar bilan gaplashib oldik. Hech kim durang haqida o‘ylayotgani yo‘q, faqat g‘alaba uchun maydonga tushamiz. “Oltin Asr” jamoasini yaxshi o‘rganib chiqdik va tarkibida Turkmaniston terma jamoasining ko‘plab o‘yinchilari borligini ko‘rdik, tajribali jamoa. Shu bois bo‘shashmaymiz va g‘alabani ko‘zlab o‘ynaymiz.
“Oltin Asr”ning bo‘ydor va baquvvat futbolchilari haqida
Haqiqatdan ham bo‘lajak raqib yakkakurashlarda ancha yaxshi o‘ynaydi. Lekin futbolda bu muhim ahamiyat kasb etmaydi, raqibdan tezroq va chaqqonroq bo‘lishimiz kerak. “Oltin Asr”ning kuchli va kuchsiz tomonlarini o‘rganib chiqdik. O‘ylaymanki, yigitlar vazifani uddalaydi.
“Xo‘jand” bilan o‘yinning ikkinchi bo‘limda gol bo‘lmagani haqida
“Xo‘jand” bilan o‘yinga jiddiy tayyorlandik va birinchi bo‘limda bor kuchimiz bilan o‘ynadik. Tanaffus vaqtida yigitlarga keyingi o‘yinga ham kuchingizni asrang dedim. Lekin hali oldinda 45 daqiqa borligini va bo‘shashmaslikni so‘radim. Istalgan jamoa 3:0 hisobidan keyin biroz ehtiyotkor o‘ynaydi. To‘g‘ri, ikkinchi bo‘limda hujumda bor kuchimiz bilan o‘ynamadik va keyingi bahs haqida o‘ylay boshladik. O‘zgarishlar qildik va yoshlarni maydonga tushirdik.
“Nasaf” uchun oson o‘tgan o‘yin haqida
“Oloy” bilan bahsning ikkinchi bo‘limi. Sababi birinchi bo‘limning o‘zida ko‘p vaziyatlar yaratdik va tanaffusdan keyin 4 ta gol urdik. “Xo‘jand” esa o‘z maydonida o‘ynadi va “Oloy”dan biroz kuchli ekanligi ko‘rinib turdi.
“Nasaf”ning OFK Kubogi finaliga yetib borish imkoni haqida
Xudo xohlasa guruhdan chiqsak tarkibni biroz kuchaytirishimiz kerak. Milliy chempionat va kubokda ham yuqori maqsadlarni qo‘yganmiz. OFK Kubogida ham uzoqqa borishni xohlaymiz. Buning uchun yozda tarkibni kuchaytirishimiz kerak. Bu borada rahbariyat bilan gaplashib olganmiz.
“Oltin Asr”ning kuchli tomonlari haqida
Kuchli tomoni —tajribali futbolchilari ko‘pligi. Tarkibda Turkmaniston milliy terma jamoasi a’zolari bor.
Ro‘ziqul Berdiyev, “Nasaf” bosh murabbiyi
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)