“Nasaf” klubi bosh murabbiyi Ro‘ziqul Berdiyev OFK Kubogi 2-turi doirasida “Xo‘jand”ga qarshi kechgan o‘yindan (3:0) keyin o‘z fikrlari bilan o‘rtoqlashdi. Bu haqda “Championat.asia” xabar qilmoqda.
Yaxshi o‘yin bo‘ldi. Biz hammasini nazorat qildik va to‘pni ham juda yaxshi saqlay oldik. Raqibni kuchli va kuchsiz tomonlarini yaxshi bilardik, eng muhimi esa biz o‘yindagi hisobni nazorat qila oldik va ushbu g‘alabaga erishdik. O‘ylashimcha, bu hisob o‘yinga mos bo‘ldi.Husniddin Aliqulovning o‘ng qanot himoyasida o‘ynagani haqida
Birinchidan, Aliqulov oldingi uchrashuvda zaxiradan tushib o‘yinga yaxshi qo‘shilib ketdi va gol ham urgandi. Ikkinchidan, o‘sha ikkita o‘ng qanot himoyachilarimiz biz kutgan o‘yinni namoyish etmagandi. Shu sabab bugun Aliqulovga imkoniyat berdik. Husniddinda o‘ng qanot himoyachisi bo‘lib o‘ynash uchun kerakli jihatlar bor, shu sabab uni ishonch bilan o‘sha joyga qo‘ydik va bu o‘zini oqladi. Qo‘shimcha qilaman, bilasiz Aliqulov bosh bilan juda yaxshi o‘ynaydi. Shu sabab standart vaziyatlarda ustunlikka erishishni maqsad qilib ham uni asosiy tarkibga kiritdik. Himoyada ham, hujumda ham standartlarda u yaxshi harakat qiladi.
Himoyaning avvalgi o‘yindan yaxshiroq ekani borasida
Biz har bir jamoaga alohida tayyorlanamiz. Agar birinchi o‘yinni oladigan bo‘lsak, raqibda bitta vaziyat yuzaga kelgandi. Yodingizda bo‘lsa afrikalik legionerda imkoniyat bo‘lgandi. O‘shanda ham himoyada biroz omadsiz o‘yin ko‘rsatgandik. Bu uchrashuvda ham hisob 1:0 bo‘lib turganda raqibning 7-raqamdagi hujumchisi bosh bilan zarba bera oldi. Darvozabonimiz qutqardi o‘sha vaziyatda. Ko‘rib turganingizdek, himoyada xatolarimiz bor, buni to‘g‘rilashimiz kerak. Himoyachilarga doim diqqatni yo‘qotmaslikni, himoyada ishonchli harakat qilib nolga o‘ynash kerakligini ta’kidlayman. Xatolar bo‘ldi, ammo menimcha bu o‘yinda ular o‘z vazifasini bajardi.
Gollarning barchasi birinchi bo‘limda urilgani haqida
Birinchi o‘yinda birinchi golni urib olishga qiynalgan edik. Bir bo‘lim sifatli hujum tashkil eta olmagandik. Bu uchrashuvda boshida gol urib olganimizdan keyin bellashuv boshqacha ko‘rinish oldi. Oldin ham aytgandim, birinchi uchrashuvda balki biroz hayajon bor edi. Mazkur bahsda esa o‘sha jihatni to‘g‘rilay oldik. Yigitlar ruhiy tomonlama juda yaxshi tayyorlangan edi. Bu bizga ustunlik bergan jihatlardan biri bo‘ldi.
Ro‘ziqul Berdiyev, “Nasaf” bosh murabbiyi
“Xo‘jand” — “Nasaf” o‘yinida urilgan gollarni bu yerda ko‘rish mumkin — video.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)