O‘zbekiston xalq artisti, rejissor Bahodir Yo‘ldoshev 76 yoshida olamdan o‘tdi

Taniqli rejissor Bahodir Yo‘ldoshev olamdan o‘tdi. Bu haqda Kinematografiya agentligi axborot xizmati xabar berdi.

Bahodir Yo‘ldoshev 1945-yilda Samarqand viloyatining Kattaqo‘rg‘on shahrida san’atkorlar oilasida tug‘ilgan. 1970-yilda Toshkent teatr va rassomlik institutini tugatgan. 1971–1974-yillarda Hamza nomidagi O‘zbek akademik drama teatrida rejissor, 1974–1984-yillarda bosh rejissor bo‘lib ishlagan.

Ko‘plab spektakllarga rejissorlik qilgan Bahodir Yo‘ldoshev aktyor sifatida Olchinbek (“Olovli yo‘llar”), Muxtorov (“Tog‘dagi uchrashuv”), Sherzod (“Olmos kamar”), Sobirov (“Oshpaz”) kabi obrazlarni yaratgan.

Bahodir Yo‘ldoshev O‘zbekistonda xizmat ko‘rsatgan san’at arbobi (1979), O‘zbekiston xalq artisti (1995) unvonlari bilan taqdirlangan.