Tesla компанияси хавфсизлик камарини тақмаган ҳолда ҳаракатланиш имконини бермайдиган янги ихтиросини патентлади. Improper seatbelt usage detection («Хавфсизлик камаридан нотўғри фойдаланишни аниқлаш») ёки ISUD номини олган тизим хавфсизлик камари тўғри тақилмаган ҳолда автомобилнинг жойидан силжишига имкон бермайди, деб ёзади Motor.
Tesla мазкур патент учун аризани 2019 йилда берган, бироқ эндигина бунга рухсат олди. Ғалати тасодифга кўра, ҳужжатларнинг тақдим этилиши электрокарлар хавфсизлигига боғлиқ можаро ва суриштирувлар пайтига тўғри келган.
2020 йилда интернетда Tesla’ни бошқариб кетаётган блогер ўзини ухлаётганга солиб олгани, бироз ўтиб орқа ўриндиққа ётиб олгани тасвирланган видео пайдо бўлганди. Электрокар автопилоти бунга эътибор қаратмасдан, ҳайдовчи ўриндиғи бўш бўлган ҳолда ҳам ҳеч нарса бўлмагандек, ҳаракатланишни давом эттирган.
Бироқ апрель ойида содир бўлган авария кўпчиликни ташвишга солиб қўйди — бунда Tesla рулида ҳеч ким бўлмаган. Ғайриоддий ЙТҲдан сўнг Consumer Reports экспертлари тажриба ўтказиб, автомобилни «алдаб», у ҳайдовчисиз ҳам ҳаракатлана олишини исботлаб берганди.
ISUD тизими ушбу камчиликларни бартараф этишга қаратилган. У ўриндиқлар ва хавфсизлик камаридаги датчикларнинг маълумотлари асосида ишлайди. Агар ISUD камар нотўғри тақилганини аниқласа, тегишли хабар мултимедиа тизимида пайдо бўлади ёки овозли хабар берилади. Шу билан бирга, электрокар жойидан силжимайди. Мазкур тизим Tesla автомобилларига қачондан жорий этилиши ҳозирча номаълум.
Аввалроқ хитойликлар Tesla электрокарларининг тепкиларини видеога олиш учун камера ўрнатишни бошлагани, бунга сўнгги вақтда ЙТҲлар ортгани сабаб бўлаётгани тўғрисида хабар берилганди.
Изоҳ (0)