Xonanda Jasur Umirovga nisbatan nomusga tegish ishi bo‘yicha dastlab jinoiy ish qo‘zg‘atishni rad etgan Kattaqo‘rg‘on IIB Tergov bo‘limi tergovchisining harakatiga baho berildi, deb xabar qiladi viloyati prokuraturasi.

2021-yil 2-fevral jinoyat ishlari bo‘yicha Kattaqo‘rg‘on shahar sudida Jasur Umirov va uning ikki sherigiga nisbatan jinoyat ishini ko‘rib chiqish bo‘yicha sud jarayoni nihoyasiga yetdi va sud hukmi e’lon qilindi. Hukmga ko‘ra, Jasur Umirov Jinoyat kodeksining 118-moddasi (nomusga tegish) 1-qismi bilan aybli deb topilib, unga 5 yil muddatga ozodlikdan mahrum qilish jazosi tayinlandi. Uning ikki sherigi esa 1,5 yilga ozodlikdan mahrum qilingan.

Jinoyat ishi tomonlarning shikoyati asosida Samarqand viloyat sudi tomonidan appelyatsiya tartibida ko‘rib chiqilib, hukm kuchida qoldirilgan.

Voyaga yetmagan qizning nomusiga tegilgani holati bo‘yicha tergovga qadar tekshiruv o‘tkazgan Kattaqo‘rg‘on tuman IIB huzuridagi Tergov bo‘limi tergovchisining harakatlari bo‘yicha Kattaqo‘rg‘on shahar prokuraturasi tomonidan tergovga qadar tekshiruv o‘tkazilgan. Tekshiruvlar natijasida tergovchi dalillarni sohtalashtirmagani, ko‘rsatmalarni o‘zgacha tarzda qayd etmagani, tergovga qadar tekshiruv harakatlarida ishtirokchilarning ko‘rsamalarini o‘zlarining so‘zlaridan yozib olgani aniqlangan.

Shu sababli unga nisbatan Jinoyat-protsessual kodeksining 83-moddasi 2-bandiga asosan jinoyat ishi qo‘zg‘atishni rad etish haqida qaror qabul qilingan.

Biroq u holat bo‘yicha qonuniy qaror qabul qilish uchun dalillarni to‘plash, tekshirish va baholashda kamchiliklarga yo‘l qo‘ygani sabab unga nisbatan viloyat IIB boshlig‘ining buyrug‘i bilan hayfsan intizomiy jazosi qo‘llanilgan. Shuningdek, mazkur holatda idoraviy nazoratni yetarli darajada taminlamagan Kattaqo‘rg‘on tuman IIB Tergov bo‘limi boshlig‘iga hayfsan, tuman IIB boshlig‘iga tanbeh intizomiy jazosi qo‘llanilgan. Viloyat IIB Tergov bo‘limi boshlig‘ining o‘rinbosari esa lavozimdan ozod qilingan.