“Sadoqatsiz” serialida Derin Arslan obrazini yaratgan Melis Sezen haqida eng qiziqarli faktlar (foto)

“Milliy” telekanali orqali namoyish etilayotgan “Sadoqatsiz” serialida Derin Arslan obrazida gavdalanayotgan Melis Sezen o‘zbek tomoshabinlari orasida ham bir qancha muxlislar orttirishga ulgurdi. Xo‘sh, aktrisa haqida muxlislarga nimalar ma’lum?

Melis Sezen Silivri shahrida tavallud topgan. Uning otasi Turkiyaga Makedoniyadan, onasi esa Gretsiyadan kelgan. Melisniing o‘zidan 4 yosh kichik Po‘lat ismli ukasi ham bor. Uning san’atga bo‘lgan qiziqishini ota-onasi hamisha qo‘llab-quvvatlab kelgan. Onasining o‘zi bo‘lajak aktrisani “Mujdat Gezden” nomli san’at markaziga yozdirgan.

“Men bunday oilada tug‘ilganimdan baxtiyorman Buning uchun taqdirdan minnatdorman. Ota-onam doimo qiziqqan narsamni bajarishda yordam bergan. Ular o‘z manfaatimga erishishim uchun vaqt hamda imkoniyat yaratib berdi. Hamisha, o‘zing yoqtirgan kasbni tanla va ishongan narsangdan hech qachon voz kechma, deb o‘rgatgan. Men ulardan minnatdorman”, – deydi Melis. Yoshligidanoq san’at markazida tahsil olayotgan Melisning ustozi ota-onasiga shunday degan: “U aktrisalikni to‘xtatishiga yo‘l qo‘ymang, teatr tomoshalarida o‘z faoliyatini boshlashi kerak”.

“U yerda men sahnada o‘zimni qanday tutishni o‘rgandim. Ovozimni sozlashni bilib oldim. O‘rta maktabgacha ushbu markazda ko‘p narsani o‘qidim. Men teatrni juda yaxshi ko‘rar edim, ammo asosiy maqsadim kamera oldida ishlashni o‘rganish edi. Aktrisalik, albatta, kamera oldida yoki teatrda rol ijro etish bilan bog‘liq emas. Lekin kamera bilan ishlashning o‘ziga xos jihatlari bor”, – deydi u.  Aktrisa bolaligini iliq xotiralar bilan yodga oladi. Uyi yonidagi ulkan bog‘, ukasi va qo‘shni bolalar bilan o‘yinqaroqlik, shuningdek, ularning uy hayvonlari ham bo‘lgan.

Melis hissiyotga beriluvchan, mas’uliyatli hamda o‘ta intizomli. Shuningdek, tanqidlarga ijobiy qaraydi. Salbiy fikrli insonlarga esa e’tibor bermaydi. Yulduz muhabbatga ishonadi. U agar sevgi chin bo‘lsa, barcha narsaning imkoni bor, deb hisoblaydi. Bundan tashqari, erkaklarning samimiylik va halolligini qadrlaydi.

Melis ko‘pincha omadsizlikka uchrasa, onasi tomonidan qo‘llab-quvvatlanadi va bundan kuch oladi. “Kerak bo‘lsa, meni shafqatsizlarcha tanqid ham qiladi, lekin eng ko‘p yordamni ham u beradi”, – deydi onasi haqida. Va har bir ishida qalbiga quloq tutadi. To‘g‘ri yo‘lni ko‘rsatishi uchun Yaratganga ibodat qiladi.

Melis vaqti-vaqti bilan dam olish, shovqin-surondan qochish, his-tuyg‘ularini o‘rganish uchun vaqt ajratadi va yolg‘iz qolishga qaror qiladi. “Iste’dodli aktyorlar va rejissorlar bilan birgalikda ishlashga muvaffaq bo‘lganimdan xursandman”, – deydi aktrisa.

“Film va teleshoularda rol o‘ynashni yaxshi ko‘raman. Odatda filmdagi personaj ustida ishlash uchun ko‘proq imkoniyat bor. Har bir sahna uchun vaqt ajratiladi. Shuningdek, oxiri yakunlanmagan ssenariy bilan ishlash juda ajoyib. To‘g‘ri, buni taxmin qilish mumkin. Ammo suratga olish jarayonida barchasi o‘zgarishi hech gap emas”, – deydi Melis. U bo‘sh vaqtlarida lotin raqslari – salsa, bachata, tango va kizomba bilan shug‘ullanadi. Lotin raqsi kechalarida ham ishtirok etishni yaxshi ko‘radi. Ko‘p vaqtini kitob o‘qish bilan o‘tkazadi. Bolaligida rasm chizish bilan ham shug‘ullangan va bu xobbi tarzida saqlanib qolgan. Suratlarni faqat o‘zi uchun chizadi va hech kimga ko‘rsatmaydi.

Melis moda olamini yaxshi ko‘radi. Yulduzlardan Jennifer Lopesning uslubini yoqtiradi. Aktrisa suratga olish ishlaridan tashqari, Instagram tarmog‘ida ham juda faol. Bir kunning o‘zidayoq bir necha postlar joylashi va birdan uzoq muddatga g‘oyib bo‘lishi ham mumkin. Buni uning o‘zi kayfiyati bilan bog‘liq deb izohlaydi.