«Садоқатсиз» сериалида Дерин Арслан образини яратган Мелис Сезен ҳақида энг қизиқарли фактлар (фото)

«Миллий» телеканали орқали намойиш этилаётган «Садоқатсиз» сериалида Дерин Арслан образида гавдаланаётган Мелис Сезен ўзбек томошабинлари орасида ҳам бир қанча мухлислар орттиришга улгурди. Хўш, актриса ҳақида мухлисларга нималар маълум?

Мелис Сезен Силиври шаҳрида таваллуд топган. Унинг отаси Туркияга Македониядан, онаси эса Грециядан келган. Мелисниинг ўзидан 4 ёш кичик Пўлат исмли укаси ҳам бор. Унинг санъатга бўлган қизиқишини ота-онаси ҳамиша қўллаб-қувватлаб келган. Онасининг ўзи бўлажак актрисани «Муждат Гезден» номли санъат марказига ёздирган.

«Мен бундай оилада туғилганимдан бахтиёрман Бунинг учун тақдирдан миннатдорман. Ота-онам доимо қизиққан нарсамни бажаришда ёрдам берган. Улар ўз манфаатимга эришишим учун вақт ҳамда имконият яратиб берди. Ҳамиша, ўзинг ёқтирган касбни танла ва ишонган нарсангдан ҳеч қачон воз кечма, деб ўргатган. Мен улардан миннатдорман», – дейди Мелис. Ёшлигиданоқ санъат марказида таҳсил олаётган Мелиснинг устози ота-онасига шундай деган: «У актрисаликни тўхтатишига йўл қўйманг, театр томошаларида ўз фаолиятини бошлаши керак».

«У ерда мен саҳнада ўзимни қандай тутишни ўргандим. Овозимни созлашни билиб олдим. Ўрта мактабгача ушбу марказда кўп нарсани ўқидим. Мен театрни жуда яхши кўрар эдим, аммо асосий мақсадим камера олдида ишлашни ўрганиш эди. Актрисалик, албатта, камера олдида ёки театрда рол ижро этиш билан боғлиқ эмас. Лекин камера билан ишлашнинг ўзига хос жиҳатлари бор», – дейди у.  Актриса болалигини илиқ хотиралар билан ёдга олади. Уйи ёнидаги улкан боғ, укаси ва қўшни болалар билан ўйинқароқлик, шунингдек, уларнинг уй ҳайвонлари ҳам бўлган.

Мелис ҳиссиётга берилувчан, масъулиятли ҳамда ўта интизомли. Шунингдек, танқидларга ижобий қарайди. Салбий фикрли инсонларга эса эътибор бермайди. Юлдуз муҳаббатга ишонади. У агар севги чин бўлса, барча нарсанинг имкони бор, деб ҳисоблайди. Бундан ташқари, эркакларнинг самимийлик ва ҳалоллигини қадрлайди.

Мелис кўпинча омадсизликка учраса, онаси томонидан қўллаб-қувватланади ва бундан куч олади. «Керак бўлса, мени шафқатсизларча танқид ҳам қилади, лекин энг кўп ёрдамни ҳам у беради», – дейди онаси ҳақида. Ва ҳар бир ишида қалбига қулоқ тутади. Тўғри йўлни кўрсатиши учун Яратганга ибодат қилади.

Мелис вақти-вақти билан дам олиш, шовқин-сурондан қочиш, ҳис-туйғуларини ўрганиш учун вақт ажратади ва ёлғиз қолишга қарор қилади. «Истеъдодли актёрлар ва режиссёрлар билан биргаликда ишлашга муваффақ бўлганимдан хурсандман», – дейди актриса.

«Фильм ва телешоуларда роль ўйнашни яхши кўраман. Одатда фильмдаги персонаж устида ишлаш учун кўпроқ имконият бор. Ҳар бир саҳна учун вақт ажратилади. Шунингдек, охири якунланмаган сценарий билан ишлаш жуда ажойиб. Тўғри, буни тахмин қилиш мумкин. Аммо суратга олиш жараёнида барчаси ўзгариши ҳеч гап эмас», – дейди Мелис. У бўш вақтларида лотин рақслари – салса, бачата, танго ва кизомба билан шуғулланади. Лотин рақси кечаларида ҳам иштирок этишни яхши кўради. Кўп вақтини китоб ўқиш билан ўтказади. Болалигида расм чизиш билан ҳам шуғулланган ва бу хобби тарзида сақланиб қолган. Суратларни фақат ўзи учун чизади ва ҳеч кимга кўрсатмайди.

Мелис мода оламини яхши кўради. Юлдузлардан Женнифер Лопеснинг услубини ёқтиради. Актриса суратга олиш ишларидан ташқари, Instagram тармоғида ҳам жуда фаол. Бир куннинг ўзидаёқ бир неча постлар жойлаши ва бирдан узоқ муддатга ғойиб бўлиши ҳам мумкин. Буни унинг ўзи кайфияти билан боғлиқ деб изоҳлайди.