Тошкентда 10 май куни бош вазир ўринбосари — инвестициялар ва ташқи савдо вазири Сардор Умурзоқов ҳамда Франция ташқи савдо ва иқтисодий жозибадорлик масалалари бўйича вазири Франк Риестер раислигида савдо-иқтисодий ҳамкорлик бўйича Ўзбекистон—Франция ҳукуматлараро комиссиясининг 8-йиғилиши бўлиб ўтди.
Инвестициялар ва ташқи савдо вазирлиги матбуот хизматининг хабар беришича, унда Франция идоралари, йирик компания ва банкларининг 50 дан ортиқ вакиллари, шунингдек, Ўзбекистон томонидан тегишли вазирлик, идора, тармоқ бирлашмалари ва тижорат банклари раҳбарлари иштирок этди.
Тадбир кун тартиби билан саноат, энергетика, қишлоқ хўжалиги, уй-жой коммунал хўжалиги, туризм, транспорт ва бошқа соҳаларда савдо-иқтисодий ва инвестициявий ҳамкорлик масалаларини қамраб олинди.
Йиғилишнинг асосий мавзуси инвестициявий ҳамкорликни янада кенгайтириш чора-тадбирлари бўлди. Бугунги кунда Ўзбекистонда қурилиш,туризм, қишлоқ хўжалиги ва хизмат кўрсатиш соҳаларида Франция капитали иштирокидаги 44 та корхона фаолият юритмоқда. Airbus, Total Eren, Eiffage, Thales, Vinci, Rungis, Orano, Suez, Leroy Merlin, Sanofi, Fives каби йирик француз компаниялари ҳамда Natixis, Credit Agricole вa Bpifrance банклари билан лойиҳаларни амалга оширишда эришилган натижалар таъкидланди.
Томонларнинг қайд этишича, муқобил энергетика, геология-қидирув, инфратузилмани ривожлантириш, қишлоқ хўжалиги, транспорт ва логистика, туризм, банк-молия соҳаларида инвестициявий ҳамкорликни чуқурлаштириш борасида ҳам салмоқли салоҳият мавжуд. Франция компанияларини Ўзбекистонда давлат активларини хусусийлаштириш дастурида иштирок этиш учун жалб қилиш имкониятлари алоҳида тартибда муҳокама қилинган.
Учрашувда томонлар ўзаро савдода мавжуд тўсиқларни бартараф этиш бўйича қўшма амалий чора-тадбирларни амалга ошириш мақсадида икки мамлакатнинг тегишли вазирлик ва идоралари ўртасида яқин ҳамкорликни йўлга қўйиш ҳамда савдо айланмасини ошириш ишларини давом эттиришга келишиб олинди. Шунингдек, Ўзбекистон иқтисодиётининг турли тармоқларида янги истиқболли лойиҳаларни ҳаётга татбиқ этиш доирасида Франциянинг тўғридан-тўғри инвестиция ва технологияларини жалб этиш борасида навбатдаги тадбирлар белгилаб олинди.
Йиғилиш якунлари бўйича Ўзбекистон Инвестициялар ва ташқи савдо вазирлиги ҳамда Франция Ташқи савдо ва иқтисодий жозибадорлик вазирлиги ўртасида 2021—2030 йилларга мўлжалланган икки томонлама иқтисодий ҳамкорлик учун «йўл харитаси» имзоланди.
Шунингдек, «Билдирсой-Чимён-Нанай» халқаро умуммавсумий курортини яратиш лойиҳасини молиялаштириш бўйича молиявий баённома ҳам имзоланди. «Gazeta.uz»нинг эслатиб ўтишича, курортнинг концепцияси ва иқтисодий модели Франциянинг Orex Loisirs, Compagnie des Alpes, Geode, Egis, Epode вa Patriarche компанияларидан иборат консорсиуми томонидан ишлаб чиқилган эди. Консорсиум ишчи гуруҳи ҳудудни дастлабки ўрганиш ишларини 2018 йилда бошлаганди. Лойиҳанинг умумий қиймати 480 миллион долларни ташкил этади, шундан 280 миллион долларини тўғридан-тўғри инвестициялар.
Лойиҳа доирасида туристик инфратузилмани ривожлантириш, шу жумладан осма кўприклар ва чанғи йўлларини қуриш режалаштирилган. Келгусида сайёҳлик зонаси ҳудудида эчки, туя ва асаларичиликни ривожлантириш асосида қўшимча хизмат турлари ташкил этилади.
Бундан ташқари, Suez компанияси томонидан амалга оширилаётган Тошкент шаҳрида сув таъминоти тизимини модернизация қилиш ва бошқариш лойиҳасини молиялаштириш тўғрисида молиявий баённома имзоланди. Аввал хабар берилганидек, лойиҳанинг умумий бюджети 185,4 миллион еврони ташкил қилади. Маблағлар шаҳар сув таъминоти ва оқава сув тармоқларини модернизация қилиш ва уларнинг бошқарувини энг юқори халқаро стандартларга мувофиқ такомиллаштиришга йўналтирилади.
Total Eren компанияси томонидан Самарқанд вилоятида 100 мегаватт қувватга эга қуёш электр станциясини қуриш бўйича молиявий битим имзоланди. Европа тикланиш ва тараққиёт банки, Европа инвестиция банки ва Proparco Франция тараққиёт агентлиги бўлинмаси билан биргаликда амалга ошириладиган молиялаштириш пакети умумий ҳисобда 87,4 миллион евро кредитни ўз ичига олган.
Франция тараққиёт агентлиги билан 2021—2025 йилларга мўлжалланган ҳамкорлик дастури имзоланди. Аввал хабар берилганидек, агентлик ушбу даврда Ўзбекистонда сув таъминоти ва канализация, энергетика, қишлоқ хўжалиги ва атроф-муҳитни муҳофаза қилиш соҳасидаги лойиҳаларни амалга ошириш учун 1 миллиард евро жалб қилмоқчи.
Аввалроқ Ўзбекистон ва Франция Ташқи ишлар вазирликлари ўртасида 2021—2022 йилларга мўлжалланган ҳамкорлик дастурини имзолагани ҳақида хабар берилган эди.
Изоҳ (0)