Rio-de-Janeyroda politsiya operatsiyasi chog‘ida 25 kishi halok bo‘ldi (foto va video)

Rio-de-Janeyro politsiyasi 6-may kuni Jakarezinyu hududida giyohvand moddalar savdosi bilan shug‘ullanuvchi to‘daga qarshi maxsus operatsiya o‘tkazdi. Operatsiya mobaynida kelib chiqqan otishmada bir nafar politsiyachi va 24 gumonlanuvchi halok bo‘ldi, deb yozadi G1 yangiliklar portali.

Portal ma’lumotlariga ko‘ra, reydda yana ikki politsiyachi jarohat olgan. Ulardan biri zarur yordam ko‘rsatilgandan so‘ng kasalxonadan chiqarildi, ikkinchi ofitserning ahvoli shifokorlar tomonidan barqaror deb baholanmoqda.

Shuningdek, otishma paytida Jakarezinyu hududidan o‘tib ketayotgan metro poyezdining ikki yo‘lovchisi jarohat olgan. Ulardan biri qo‘lidan o‘q yegan, ikkinchisi oyna parchalari bilan jarohatlangan. O‘z uyida bo‘lgan yana bir fuqaroning oyog‘iga o‘q uzilgan.

Qayd etilishicha, operatsiya giyohvand moddalar savdosi, talonchilik, odam o‘ldirish va o‘g‘irlash bilan shug‘ullanuvchi to‘daga qarshi o‘tkazilgan. Politsiya jinoyatchilar bolalar va o‘smirlarni o‘z to‘dalariga jalb qilayotgani to‘g‘risidagi ma‘lumotlar sababli maxsus operatsiya boshlaganini aytdi.

Bundan tashqari jinoyatchilar kambag‘al aholini uylaridan quvib chiqarayotgani haqida xabarlar kelib tushgan. Shuningdek, ular jinoyatlar izlarini yashirishda ayblanmoqda. Rio-de-Janeyro fuqarolik politsiyasi ma’lumotlariga ko‘ra, reyd paytida o‘ldirilganlardan 21 nafari jinoyatchi ekani aniqlangan.

G1 ta’kidlashicha, reyd paytida hududning turli qismlaridan avtomat va portlash ovozlari eshitilib turgan, hudud atrofidan vertolyot uchib o‘tgan. Jakarezinyu aholisi, jumladan o‘sha kuni to‘yi bo‘lishi kerak bo‘lgan kelin ham uyidan chiqolmagan.