Buyuk Britaniya hukumati Chempionlar Ligasi finalini Istanbuldan Angliyaga ko‘chirish borasida UEFA bilan muzokaralar olib bormoqda, deya xabar qilmoqda The Telegraph.
Bunga sabab qilib Turkiyaning koronavirus bilan bog‘liq vaziyat tufayli turistlar uchun “qizil hudud”ga aylangani ko‘rsatilmoqda. “Qizil ro‘yxat”dagi mamlakatlardan Britaniyaga qaytgan har qanday shaxs 10 kun mobaynida karantinda saqlanadi.
Bu holat Angliya terma jamoasining Yevro—2020 tayyorgarlik jarayoniga salbiy ta’sir qiladi. “Manchester Yunayted” va “Chelsi” safida Angliyaning ko‘plab futbolchilari to‘p tepadi.
Shu sabab britan hukumati, Angliya futbol assotsiatsiyasi va UEFA finalni Istanbuldan ko‘chirish masalasini muhokama qilmoqda.
Avvalroq final “Tottenhem”ning uy stadionida o‘tishi mumkinligi xabar qilingandi.
Final bahsi 29-may kuniga mo‘ljallangan.
Eslatib o‘tamiz, koronavirus sabab 2019/20-yilgi mavsum finali ham Turkiyadan olib qo‘yilgandi.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)