Qozog‘iston prezidenti Qosim-Jo‘mart To‘qayev 9-may kuni Rossiya poytaxti Moskvada bo‘lib o‘tadigan G‘alaba paradida ishtirok etmaslikni rejalashtirmoqda. Bu haqda prezidentning matbuot kotibi Berik Ualiga tayanib “TASS” xabar berdi.

Foto: Sputnik

“Prezident matbuot xizmatiga OAV vakillaridan Qosim-Jo‘mart To‘qayevning G‘alaba kuniga bag‘ishlangan Moskvadagi paradda ishtirok etishiga izoh berish iltimosi bilan murojaatlar kelib tushmoqda. Rossiya tomonidan bunday taklif berilmadi, shuning uchun prezidentning jadvalida Moskvaga tashrif rejalashtirilmagan”, — deb yozdi matbuot kotibi o‘zining Facebook sahifasida.

Aprel oyining oxirida Rossiya prezidentining matbuot kotibi Dmitriy Peskov hukumatning 9-may kuni Moskvada bo‘lib o‘tadigan G‘alaba paradi uchun chet el davlatlarining rahbarlariga maxsus taklifnomalar yubormaganini ma’lum qildi.

2021-yilgi mamlakatning asosiy harbiy paradida 12 mingdan ortiq odam, 190 dan ortiq qurol-yarog‘ va harbiy texnika, shuningdek, 76 ta uchuvchi qurilma — 53 ta samolyot va 23 ta vertolyot ishtirok etishi ko‘zda tutilgan. Rossiya mudofaa vaziri Sergey Shoygu paradga tayyorgarlik doirasida harbiy qismlarda koronavirusning tarqalishiga yo‘l qo‘ymaslik uchun zarur choralar ko‘rilishini buyurdi.

Ma’lumot uchun, Qozog‘iston prezidenti Qosim-Jo‘mart To‘qayev 19—20-may kunlari rasmiy tashrif bilan Tojikistonga kelib, mazkur mamlakat rahbari Emomali Rahmon bilan muzokaralar olib boradi.

Avvalroq Tojikiston rahbari Emomali Rahmon Ikkinchi jahon urushidagi g‘alabaning 76 yilligiga bag‘ishlangan parad mehmoni sifatida Moskvaga tashrif buyurishi ma’lum bo‘ldi.

Paraddan oldin Emomali Rahmon 8-may kuni Rossiya prezidenti Vladimir Putin bilan muzokaralar olib borishi kutilmoqda.  Rossiya prezidentining matbuot kotibi Dmitriy Peskov davlat rahbarlari Tojikiston va Qirg‘iziston chegarasidagi vaziyatni muhokama qilishini aytdi.