Toshkent shahrining Yunusobod tumani hokimi Jahongir Ibrohimovda koronavirus aniqlandi. Bu haqda hokimlik matbuot xizmati xabar berdi.
“Yunusobod tuman hokimi Jahongir Ibrohimovda COVID-19 aniqlangani bois, haftaning har juma kuni fuqarolar uchun tashkil etiladigan sayyor qabulni ma’lum muddat tuman hokimining birinchi o‘rinbosari Amir Muhitdinov o‘tkazadi”, — deyiladi xabarda.
Eslatib o‘tamiz, Jahongir Ibrohimov 2021-yilning yanvar oyida Yunusobod tumaniga hokim etib tayinlangandi. Bunga qadar u Bektemir tumani hokimi lavozimida faoliyat yuritgan.
Avvalroq Qashqadaryo viloyati hokimi Zoir Mirzayev koronavirusga chalingani ma’lum bo‘lgandi. Viloyat hokimlari orasida ayni kunga qadar Navoiy viloyati hokimi Qobul Tursunov, Surxondaryo viloyati hokimi To‘ra Bobolovlar kasallikka chalinib, davolanib chiqqan.
Pandemiya davrida vafot etganlar
2020-yil 19-oktabr kuni Kattaqo‘rg‘on tumani hokimi A’zamxon Bahromov vafot etgani haqida xabar berildi. 7-oktabr kuni Andijon viloyati Oltinko‘l tumani hokimi Nazirjon O‘rinboyev va Namangan viloyati hokimi o‘rinbosari Bahromjon Nurmatov uzoq davom etgan xastalikdan so‘ng vafot etgani ma’lum bo‘lgan edi. 29-sentabr kuni Andijon viloyatining Xonobod shahri hokimi Musaxon Mamadaliyev o‘tkir yurak qon-tomir yetishmovchiligi kasalligidan vafot etgani e’lon qilingan edi.20-sentabr kuni bosh vazir o‘rinbosari O‘ktam Barnoyev, 8-sentabrda Qashqadaryo viloyati Mirishkor tumani hokimi G‘ayrat Begaliyev, 22-avgustda Buxoro viloyati hokimi Karim Kamolov, 31-iyulda Qoraqalpog‘iston rahbari Musa Yerniyazov, 24-iyulda Qoraqalpog‘istonning Qonliko‘l tumani hokimi Daulet Tolibayev vafot etgan. Ularning barchasi koronavirus infeksiyasi asoratlari oqibatida vafot etgan.
Izoh (0)