Mobil qurilmalarning IMEI kodlarini ro‘yxatga olish tizimi operatorining ishlashi bo‘yicha qisqa ma’lumot

Joriy yilning boshidan “O‘zTTBRM” DUK (mobil qurilmalarning IMEI kodlarini ro‘yxatga olish tizimi operatori)ga pasport ma’lumotlari begona shaxslar tomonidan noqonuniy foydalanilib kelinayotganligi bo‘yicha ko‘plab murojaatlar kelib tushmoqda. Tizim operatori tomonidan ommaviy axborot vositalari orqali ogohlantiruvchi choralar berilayotganligiga qaramasdan, ko‘plab iste’molchilar mobil qurilmalarni xarid qilishda shu jihatlarga e’tibor qaratmadi.

Joriy yilning birinchi choragi davomida begona pasport ma’lumotlariga 200 mingdan ko‘p mobil qurilmalarning ro‘yxatga olinish holatlari aniqlanganligi, o‘z navbatida bunday qurilmalar belgilangan tartibda tizimdan o‘chirilgan hamda haqiqiy pasport egalariga ularga tegishli bo‘lgan mobil qurilmalar rasmiylashtirilgan. Bunday tartib buzilishlar ro‘yxatga olingandan so‘ng aniqlanmoqda. Chunki ro‘yxatga olish jarayoni onlayn rejimida amalga oshiriladi va tizim operatori jarayonning ikkinchi tomonida ro‘yxatdan o‘tkazuvchining kimligi, pasport egasi yoki qoidabuzar bo‘yicha ma’lumotga ega emas. Onlayn rejimida ro‘yxatga olishni bekor qilish iste’molchilar tomonidan yanada ko‘proq noroziliklarga olib keladi. Hozirgi vaziyatdan kelib chiqib, fuqarolarga ularning shaxsiy ma’lumotlari (ushbu holatda pasport) begona shaxslar tomonidan foydalanilishini oldini olishda yanada e’tiborli bo‘lishlari maqsadga muvofiq, deb hisoblanadi.

UZIMEI tizim operatori fuqarolarning pasport ma’lumotlarini begona shaxslar tomonidan foydalanilishi bo‘yicha javobgar hisoblanmaydi. UZIMEI rasmiy sayti, samarali foydalanishda qulayliklar yaratish uchun, iste’molchilarning takliflarini inobatga olgan holda yangilanib borilishini ta’kidlab o‘tmoqchimiz. Yangiliklardan biri, pasport egalari ogohlantirilmasdan, ruxsatsiz qaysi IMEI kodlar va mobil qurilmalar uning ma’lumoti asosida ro‘yxatga olinganligi bo‘yicha axborot olish imkoniyati yaratiladi.

Shu bilan birga, joriy yilning birinchi choragi davomida bajarilgan ishlarni ta’kidlab o‘tmoqchimiz. Mobil qurilmalarni ro‘yxatga olish bo‘yicha tahlil o‘tgan yilning birinchi choragiga nisbatan qurilmalarni rasmiy ravishda olib kirish ko‘rsatkichining oshganligini ko‘rsatdi. Jumladan, o‘tgan yilning birinchi choragida rasmiy olib kirish ko‘rsatkichi 30 foizdan kam bo‘lgan bo‘lsa, joriy yilning birinchi choragi bo‘yicha bu ko‘rsatkich 72 foizni tashkil etmoqda. Bu o‘z navbatida import rasmiy hajmining oshganligi va ushbu sohaning rivojlanishida tadbirkorlik faoliyatining sofligini ko‘rsatmoqda. Ushbu tendensiyalardan kelib chiqib, yaqin kelajakda iste’molchilar tomonidan “IMEIni ro‘yxatga olish uchun nima sababdan to‘lov qilishimiz kerak”, — degan e’tirozlarning yo‘qolishiga olib kelishiga umid qilamiz. Chunki iste’molchilar tomonidan ro‘yxatga olish uchun to‘lov amalga oshirilmaydi.

Eslatib o‘tmoqchimizki, mobil qurilmalarni rasmiy ravishda import qilishda, ularning IMEI kodlari chakana savdo majmualariga kelib tushganidan oldin ro‘yxatga olinadi. Narx siyosati esa ushbu bozordagi sog‘lom raqobatdan kelib chiqadi. Respublikada raqamli iqtisodiyotni rivojlantirish bo‘yicha kompleks choralar amalga oshirilmoqda hamda zamonaviy axborot-kommunikatsiya texnologiyalari joriy etib kelinmoqda. Shuningdek, ijtimoiy loyihalar ham bir chekkada qolib ketmayapti. Rivojlanishga ajratilayotgan manbalardan “O‘zTTBRM” DUK tomonidan O‘zbekiston Respublikasi mobil aloqa tarmoqlarida abonent raqamlarini ko‘chirish xizmati joriy qilinmoqda.

O‘zbekiston Respublikasi Prezidentining 2020-yil 5-oktabrdagi PF 6079-son “Raqamli O‘zbekiston — 2030 strategiyasini tasdiqlash va uni samarali amalga oshirish chora-tadbirlari to‘g‘risida”gi farmoni bilan, O‘zbekiston Respublikasi mobil aloqa tarmoqlarida abonent raqamini ko‘chirish tizimi (ARKT)ni joriy etish bo‘yicha qaror qabul qilingan (mobil aloqa tarmoqlarida abonent raqamining ko‘chirilishi xizmati — Mobile Number Portability MNP xizmati).

O‘zbekiston Respublikasining mobil aloqa tarmoqlarida abonent raqamini ko‘chirish tizimining yaratilishidan maqsadlar:

• ARKT tizimi bilan operatorlar tarmoqlarini birlashtirish;
• MNP xizmatini joriy etish – abonentga boshqa mobil aloqa operatori bilan aloqa xizmatlarini ko‘rsatish uchun shartnoma tuzishda, o‘z abonent raqamini saqlab qolish imkoniyatini yaratish;
• mobil aloqa operatoriga abonent raqami tegishliligini tekshirish bo‘yicha elektron xizmatini taqdim etish uchun sharoitlarni ta’minlash;
• mobil aloqa operatorlari o‘rtasida raqobatni rivojlantirishga rag‘batlantirish, taqdim etilayotgan xizmatlar sifatini oshirish.

O‘zbekiston Respublikasi Vazirlar Mahkamasining 2020-yil 30-oktabrdagi “O‘zbekiston Respublikasi telekommunikatsiyalar tarmoqlarini boshqarish tizimini takomillashtirishga oid qo‘shimcha chora-tadbirlar to‘g‘risida”gi 680-son qarori bilan “O‘zTTBRM” DUK Respublika telekommunikatsiya tarmoqlari va resurslarini boshqarish bo‘yicha vazirlikning ishchi organi deb belgilangan. Ushbu vazifalardan kelib chiqib, ishchi organga ko‘chib o‘tgan raqamlarni yig‘ish, saqlash, qayta ishlash to‘g‘risidagi ma’lumotlarning markazlashtirilgan bazasining shakllantirilishi va ishlashini hamda ma’lumot, axborotlarni uzatishni ta’minlash yuklatilganligini eslatib o‘tmoqdamiz.

Telegram: uzimei_active

Reklama huquqi asosida.