Qirg‘izistonda 11-aprel, yakshanba kuni Konstitutsiyaning yangi tahriri bo‘yicha referendum bilan bir vaqtda o‘tkazilgan mahalliy kengashlarga saylovlar natijalarini bekor qilish talabi bilan mamlakat Markaziy saylov komissiyasi binosi yonida 100 ga yaqin odam to‘plandi, deb yozadi “Interfaks”.

Foto: “RIA Novosti”

Aksiya ishtirokchilari saylov yakunlariga ko‘ra Bishkek shahar kengashiga kirmagan “Reforma”, “Butun Qirg‘iziston”, Sotsial-demokratlar, Qirg‘iziston sotsialistik partiyasi, Qirg‘iziston kommunistlar partiyasi, “Ulutman”, “Tinchlik” partiyalari nomidan chiqdi. Ular saylovchilarni o‘z tomoniga og‘dirib olish va ma’muriy resursdan foydalanish bilan bog‘liq ommaviy qonun buzilishlari tufayli mahalliy kengashlarga saylovlar natijalarini bekor qilishni talab qilmoqda.

Ovoz berishning dastlabki yakunlari e’lon qilinganidan keyin “Reforma” partiyasi saylov natijalarini tan olmasligini ma’lum qildi.

“7 foizli marradan o‘tgan deyarli barcha partiyalar saylovchilarni pora orqali og‘dirib olish, fuqarolarga bosim o‘tkazish uchun uy qo‘mitalari va boshqa hokimiyat organlaridan foydalangani qayd etilgan. Kuzatuvchilar saylov kampaniyasi chog‘ida ham, ovoz berish kuni ham ko‘plab qonun buzilish holatlarini aniqladi. Shunga qaramay, Markaziy saylov komissiyasi bu partiyalarning hech birini chetlatmadi”, — deyiladi bayonotda.

Bishkek hududiy saylov komissiyasi partiyalar, kuzatuvchilar va jamoat fondlaridan kelib tushgan shikoyatlar asosida 8 ta saylov uchastkasidagi binodan tashqarida berilgan ovozlar natijalarini bekor qildi.

MDHning kuzatuvchilar missiyasi esa referendum xalqaro talablarga mos ravishda o‘tkazilganini ma’lum qildi. Referendum kuni kuzatuvchilar Bishkek hamda Chuy viloyatidagi 78 ta uchastkani borib ko‘rgan.

Eslatib o‘tamiz, 11-aprel kuni Qirg‘izistonda konstitutsiyaga o‘zgartirishlar kiritish to‘g‘risidagi referendum va mahalliy organlarga saylovlar bo‘lib o‘tdi.

MSK dastlabki ma’lumotlariga ko‘ra, referendumda saylovchilarning 37,33 foizi qatnashdi, uchastkalarga 1 million 346 ming fuqaro bordi. Saylovchilarning yakuniy ro‘yxatiga jami 3 million 606 ming kishi kirgan.

97,66 foiz ovozlar hisoblab chiqilganidan keyin ma’lum bo‘lishicha, saylovchilarning 79,24 foizi yoki 1 million 66 ming kishi Konstitutsiyaning yangi tahririni yoqlab ovoz bergan.

Referendum bilan bir vaqtda 28 ta shahar va 420 ta qishloq okruglarida mahalliy kengashlarga saylovlar bo‘lib o‘tdi. Dastlabki ma’lumotlar bo‘yicha “Ata Jurt Qirg‘iziston” partiyasi mahalliy kengashlar deputatlari saylovida eng ko‘p ovoz to‘plagan. Ekspertlar fikricha, partiya hukumatparastdir.