Qashqadaryo viloyatining Qarshi tumanidagi avtomobillarga gaz quyish shoxobchasida Nexia-1’ga o‘rnatilgan gaz balloni portlagani va oqibatda bir kishi vafot etgani xabar berilgandi. Viloyat IIB, YHXB boshlig‘i Ahmad Soatovning aytishicha, mazkur mashina gaz balloni muddati o‘tganligi sababli portlagan. Bu haqda Qarshi shahridagi Madaniyat uyida Qashqadaryo viloyat IIB YHXB, viloyat Transport boshqarmasi hamkorligida o‘tkazilgan tadbirda ma’lum qilindi, deya xabar berdi “Daryo” muxbiri.
“Eshitgandirsizlar, ota-bola texnika xavfsizligiga rioya qilmagan holda Qarshi tumanidagi gaz zapravkaga birga kiryapti. Ota kassaga boryapti, o‘g‘li esa yukxonani ochib-yopyapti. O‘sha paytda mashina portlab, bolani tepaga uloqtirib, ikkiga bo‘lib yuboryapti. Ko‘rsangiz, judayam dahshat. Bolani bo‘laklarga bo‘lib tashlagan”, — deydi voqea haqida gapirgan Ahmad Soatov.
YPX inspektorlari boshlig‘ining ma’lumot berishicha, gaz balloni portlagan mashina texnik ko‘rikdan ham o‘tkazilmagan.
“Avvalo, gaz zapravkada mashina balloniga 200 dan ortiq bosim urilyapti. Avtomobil gaz balloni esa texnik ko‘rikdan ham o‘tmagan ekan. Taksi faoliyati bilan shug‘ullangan haydovchi uyushma tomonidan texnik ko‘rikka chaqirilgan. Ammo avtomobil egasi bormagan. Boisi, gaz balloni muddati o‘tgan bo‘lgan”, — dedi Ahmad Soatov.
Ahmad Soatov YPX inspektorlarining gaz ballonini tekshirishga bo‘lgan urinishi jamoatchilik e’tiroziga sabab bo‘layotganini eslatib, bu haydovchilar sog‘lig‘i, ularning oilasi tinchligi uchun ekanligini ta’kidlagan.
“Internetda ko‘ryapsizlar, har xil ma’lumotlar tarqalyapti. Biz sizning va oilangizning sog‘lig‘ini o‘ylaganimiz uchun shu ishlarni (gaz balloniga oid hujjatlar tekshirilishi nazarda tutilmoqda. Tahririyat izohi) qilyapmiz. Maqsadimiz sizga jarima to‘latib, davlatni boyitish emas. Biz qonun ijrosini nazorat qilyapmiz”, — dedi Ahmad Soatov.
Ahmad Soatov viloyatda taksilar faoliyatini nazorat qiluvchi uyushmalar haqida ham to‘xtalib o‘tib, YTHlarning sodir bo‘lishida taksi haydovchilarining noqonuniy xatti-harakati sabab bo‘layotganini qo‘shimcha qilgan.
“Yo‘lovchi tashish bilan shug‘ullanib, uyga toliqib qaytgan ota ko‘chadan kelib, o‘g‘liga kalitni beryapti va bir soat aylanib kel deyapti. Bu ahir noqonuniy”, — dedi Ahmad Soatov.
Izoh (0)