Buxoroda fermer xo‘jaliklariga ajratilgan salkam 150 mln so‘mlik dizel yoqilg‘isini talon-toroj qilgan shaxslarga jinoyat ishi qo‘zg‘atildi

Buxoro tumanida bir guruh shaxslar fermer xo‘jaliklariga “Buxoroneftbaza” MChJ tomonidan ajratilgan dizel yoqilg‘isini talon-toroj qilgani ma’lum bo‘ldi. Holat Bosh prokuratura huzuridagi Departamentning Buxoro tuman bo‘limi tomonidan o‘tkazilgan tadbirda aniqlandi, deya xabar berdi “Daryo” muxbiri.

Ta’kidlanishicha, Bosh prokuratura huzuridagi Departamentning Buxoro tuman bo‘limi tomonidan tergovga qadar tekshiruv o‘tkazilgan. Va 9-sonli fermerlarga yoqilg‘i tarqatish shoxobchasida moddiy javobgar shaxslarning o‘zaro kelishuvi borligi aniqlangan.

Aniqlanishicha, kelishuvga erishgan mas’ullar hujjatlarga soxta ma’lumotlar kiritib, dizel yoqilg‘isini o‘zlashtirish va rastrata qilish yo‘li orqali undan moddiy manfaatdor bo‘lgan. Hisob-kitoblarga ko‘ra, mas’ullar “Buxoroneftbaza” MChJ tomonidan ajratilgan umumiy qiymati 143,8 million so‘mlik 20,7 ming litr dizel yoqilg‘isini talon-toroj qilgan.

Holat yuzasidan Jinoyat kodeksining 167-moddasi (talon-toroj qilish) va 228-moddasi (hujjatlarni qalbakilashtirish) bilan jinoyat ishi qo‘zg‘atilib, tergov harakatlari olib borilmoqda.