Chevrolet 2021-yilning mart oyida Qozog‘iston avtomobil bozorida eng ko‘p sotilgan brendlar reytingiga boshchilik qildi, deb xabar beradi UzAuto Motors matbuot xizmati.
Ma’lum qilinishicha, qo‘shni mamlakatda mart oyida sotilgan deyarli har to‘rtinchi yangi avtomobil UzAuto Motors tomonidan ishlab chiqarilgan.
Kompaniyaning umumiy savdo hajmi 2161 donani tashkil etgan bo‘lib, ushbu ko‘rsatkich fevral oyiga nisbatan 15 foizga ko‘p. Reytingdagi ikkinchi o‘rinni Hyundai egallagan bo‘lsa, uchinchi pog‘ona Toyota’ga nasib etgan.
Umumiy savdolar bo‘yicha yetakchiga Cobalt modeli aylangan — 1001 dona avtomobil. Ikkinchi o‘rinni ham Chevroletning yana bir modeli — Nexia egallagan (873 ta). Hyundai Accent’dan esa mart oyida 763 dona sotilgan.
“Newauto.kz” saytida (Qozog‘istondagi avtosalonlar agregatori) Cobalt narxi jamlanmasidan kelib chiqib, 4,7 millionda tengedan 5 million tengegacha ekanligi ko‘rsatilgan (113 milliondan 120 million so‘mgacha).
Eslatib o‘tamiz, 2020-yilning martida UzAuto Motors Qozog‘istonda Chevrolet ishlab chiqarishni boshlagan. Dastlabki bosqichda ishlab chiqarish hajmi yiliga 26 000 transport vositasini tashkil qiladi, kelgusida uni 100 000 donaga yetkazish ko‘zda tutilgan.
Izoh (0)