Cobalt Қозоғистонда март ойида энг кўп сотилган автомобилга айланди

Chevrolet 2021 йилнинг март ойида Қозоғистон автомобиль бозорида энг кўп сотилган брендлар рейтингига бошчилик қилди, деб хабар беради UzAuto Motors матбуот хизмати.

Маълум қилинишича, қўшни мамлакатда март ойида сотилган деярли ҳар тўртинчи янги автомобиль UzAuto Motors томонидан ишлаб чиқарилган.

Компаниянинг умумий савдо ҳажми 2161 донани ташкил этган бўлиб, ушбу кўрсаткич февраль ойига нисбатан 15 фоизга кўп. Рейтингдаги иккинчи ўринни Hyundai эгаллаган бўлса, учинчи поғона Toyota’га насиб этган.

Умумий савдолар бўйича етакчига Cobalt модели айланган — 1001 дона автомобиль. Иккинчи ўринни ҳам Chevroletнинг яна бир модели — Nexia эгаллаган (873 та). Hyundai Accent’дан эса март ойида 763 дона сотилган.

«Nеwаutо.kz» сайтида (Қозоғистондаги автосалонлар агрегатори) Cobalt нархи жамланмасидан келиб чиқиб, 4,7 миллионда тенгедан 5 миллион тенгегача эканлиги кўрсатилган (113 миллиондан 120 миллион сўмгача).

Эслатиб ўтамиз, 2020 йилнинг мартида UzAuto Motors Қозоғистонда Chevrolet ишлаб чиқаришни бошлаган. Дастлабки босқичда ишлаб чиқариш ҳажми йилига 26 000 транспорт воситасини ташкил қилади, келгусида уни 100 000 донага етказиш кўзда тутилган.