Бухорода Иккинчи жаҳон уруши қатнашчиси 102 ёшли Аҳмад Ғуломовнинг хонадони ҳокимликка қилинган қатор мурожаатларга қарамай, таъмирланмасдан келмоқда, деб хабар беради «Халқ сўзи Online».
Аҳмад Ғуломов 1939 йилда армияга кетган ва Финляндия билан кечган урушда қатнашган. Фашистлар Германиясига қарши аёвсиз жангларда иштирок этган. Япон уруши қатнашчиси бўлган. Етти йилдан сўнг, 1946 йилда Ўзбекистонга соғ-омон қайтиб келган.
Ҳозирда Аҳмад Ғуломов ўғлининг оиласи билан бир ҳовлида яшайди. «Ҳаммом ва ҳожатхона ҳовлининг чеккасида жойлашган. Ҳар кеча зарурат юзасидан 3-4 марта чиқишимга тўғри келади. Қийналаман. Яшаб турган уйимнинг аҳволини эса кўриб турибсиз. Ўғлим ҳам пенсионер. Нафақага яшайди. Бу уйни қайтадан қуришга қурби етмайди», — дейди уруш фахрийси.
Мазкур уй ХХ асрнинг 50- йилларида хом ғиштдан тикланган. Йиллар ўтиб, уй пойдевори йўл (кўча)дан чамаси бир-бир ярим метрча пастда қолган. Зах, деворлар нураган, чакки ўтади. Ҳатто икки-уч йилча муқаддам уйга ёндош даҳлизнинг болори синган. У ҳали-ҳануз шундоқлигича турибди.
Таъкидланишича, оила ушбу масалаларда шаҳар ҳокимлигига бир неча бор мурожаат қилган.
«Вилоятимиз раҳбари, раҳматли Ўктам Барноев байрам муносабати билан уйимизга келганларида масъулларга тегишли топшириқларни берди. Ҳатто қўшнимизнинг мана бу ҳолатдаги ҳовлисини кўриб, бу оилага ҳам кўмаклашиш кераклигини айтди. Биласиз, байрам баҳонасида уйимизга катта-кичик меҳмонлар келади. Сизга ёлғон, бизга чин, ҳар йил 9 май арафасида қўшни ҳовлидаги ёнғин асоратлари кўринмасин, деб бу ерни кўча томондан тўсиб қўйишади», — дейди Маҳмуд Ғуломов.
Маълум бўлишича, Маҳмуд Ғуломов назарда тутган қўшни ҳовлида ҳам Иккинчи жаҳон уруши қатнашчиси яшаган. У вафот этгач, нима сабабдандир бу уйда ёнғин содир бўлган. Ёнғин бир амаллаб ўчирилган. Аммо орадан уч-тўрт йил ўтса-да «асорати» шундоқ турибди. Айтишларича, уйни бузиб қайта қуришга оиланинг қўли калталик қилади.
Нашр Бухоро шаҳар ҳокими ўринбосари Ўткир Жумаевнинг (ҳозирда у шаҳар ҳокими) Турсуной кўчаси 12-уйда яшовчи Иккинчи жаҳон уруши қатнашчиси Аҳмад Ғуломов номидан юборган мурожаатига 2020 йилнинг 28 февралида йўллаган жавоб хатини келтирган.
Сизнинг ёшингиз 101 да эканлиги, пенсионер ўғлингиз ҳовлисида истиқомат қилиб келаётганингиз, уй-жойдаги ҳожатхона узоқроқда жойлашгани сабабли қийналаётганингиз боис шароитлар яратиб беришни сўраб ёзган аризангиз шаҳар ҳокимлиги томонидан ўрганиб чиқилиб, сизнинг Улуғ Ватан уруши қатнашчиси эканингиз, улуғ ёшда —101 ёшга кирганингиз, шунингдек, яшаб келаётган шароитингизни инобатга олиб, уй-жойингизга шароит яратиб беришни сўраб ёзган аризангизни ўрганиб чиқилиб, қуйидагиларни билдирамиз.Ҳомий ташкилот топилганига қарамай, ҳеч қандай ёрдам кўрсатилмагани боис Аҳмад Ғуломов яна шаҳар ҳокимлигига мурожаат қилган.Аризангиз тегишли соҳа мутахассислари томонидан уйдаги шароитлар жойида ўрганиб чиқилди. Сизнинг ёшингиз ва уйдаги шароитлардан келиб чиқиб ҳомий ташкилот аниқлангани (20-трестига қарашли ART Prof bilding МЧЖ) ва 2020 йилнинг апрель ойида амалий ёрдам бериш режалаштирилганини маълум қиламиз.
Сиз мазкур аризангиз бўйича олинган жавобдан қониқмаган тақдирда, юқори турувчи ҳокимлик ёки суд органларига мурожаат қилишингиз мумкинлигини билдирамиз.
2020 йилнинг 23 сентябри санаси билан келган жавоб хатида шаҳар ҳокими ўринбосари С. Шарипов «Уйингизни таъмирлаб бериш мақсадида қурувчи ҳомий ташкилот танланмоқда. Ташаббускор ҳомий ташкилот ҳомийлик ташаббусини билдирганида уйингизни таъмирлаш учун қурилиш материаллари олиб берилишини билдирамиз», — деб ёзган.
Бироқ «танлов» чўзилиб кетган. Кутавериб тоқати тоқ бўлган уруш қатнашчиси яқинда яна бир бор шаҳар ҳокимига ёзма мурожаат қилган. Жавоб ҳам келган. С.Шарипов имзоси билан йўлланган хатда ариза жойида ўрганилгани, ҳомий ташкилот аниқланганидан сўнг 2021 йилнинг май—июнь ойларида уй таъмирига амалий ёрдам берилиши айтилган.
«Мурожаатга жўяли бир жавоб олармиканмиз, деб шаҳар ҳокимига учрашдик. Ҳоким қурилиш бўйича масъуллардан бири Собиров Азимга ‘Бу отахоннинг масаласини биринчи навбатда ҳал этинглар’, дея топшириқ берди. У эса ‘Бунинг учун қурилиш фирмаси топишимиз’ керак қабилидаги важларни рўкач қилди. Алдайди. Бу ҳам камлик қилганидай, ‘Набиралар, абиралар бор, бобога бир қаранглар-да’ деганини айтмайсизми? Қорнимгамас, қадримга йиғлайман, деганлари шу бўлса керак-да. Ахир, Иккинчи жаҳон уруши қатнашчилари орамизда жуда кам қолди. Уларни ҳар қанча эъзозласак арзийди», — дейди отахоннинг жияни, 65 ёшли Рауф Нарзиев.
Маълумот учун, Иккинчи жаҳон урушига Бухородан 73 688 нафар киши жўнаб кетган. Уларнинг 30 минг нафардан зиёдроғи омон қайтган.
Изоҳ (0)