Tokiodaning Suginami shahridagi boshlang‘ich maktablardan birining o‘quvchi yoshlari 2021-yilning iyulida boshlanadigan Olimpiada va Paralimpiada o‘yinlariga tayyorgarlik loyihasi doirasida O‘zbekiston madhiyasini kuyladi.
Suginami shahri Tokioning g‘arbiy qismida joylashgan alohida 23 ta tumandan biri hisoblanadi. 570 ming aholi istiqomat qiladigan shahar o‘zining bog‘lari va ko‘kalamzorlari bilan mashhur. Suginami shahri har yili avgust oxirida o‘tkaziladigan Tokyo Koenji Awa-Odori festivali bilan dunyoga tanilgan. Unda 10 mingga yaqin raqqoslar va millionlab tomoshabinlar Tokioning jozibadorligini o‘zida mujassam etgan bayramda ishtirok etadi.
Shahar meri Rio Tanaka va O‘zbekistonning Yaponiyadagi elchisi G‘ayrat Fozilov o‘rtasida 2020-yilning 25-fevralida imzolangan kelishuvga ko‘ra, Suginami o‘zbekistonlik sportchilar uchun mezbon shaharga aylangan.
Boks bo‘yicha O‘zbekiston terma jamoasi Tokio—2020 Olimpiada va Paraolimpiada o‘yinlaridan oldingi mashg‘ulotlarni aynan shu shaharda o‘tkazadi.
Tokaydodagi boshlang‘ich maktab o‘quvchilari loyihalardan biri doirasida O‘zbekiston jamoasini qo‘llab-quvvatlab, mamlakat davlat madhiyasini kuyladi. Bu safar ular yapon filarmonik orkestri bilan chiqish qilgan.
O‘quvchilarga O‘zbekiston haqida ko‘proq ma’lumotga ega bo‘lishi uchun ularga turli slaydlar orqali darslar o‘tilgan.
O‘quvchi yoshlar “O‘zbekistonni qo‘llab-quvvatlaymiz!”, “Tabassum bilan g‘alabaga erish”, “Kel, do‘st bo‘lamiz” kabi shiorlar ostida o‘zbekistonlik sportchilarni qo‘llab-quvvatlashga chaqirmoqda.
Izoh (0)