Andijonda qalbaki dollarlar evaziga 9 ta iPhone 12 sotib olishga, Namanganda esa qalbaki pullarni bankka o‘tkazishga uringan shaxslar ushlandi

Toshkent viloyatining Yuqori Chirchiq tumanida qalbaki AQSh dollarlarini muomalaga kiritishga uringan shaxslar qo‘lga olindi. Bu haqda DXX matbuot xizmati “Daryo”ga ma’lum qildi.

Ma’lum qilinishicha, Andijon shahrining Yangibozor hududida joylashgan savdo majmuasiga 4 nafar fuqaro kelib, narxi 1100 dollar bo‘lgan iPhone 12 rusumli uyali aloqa telefonining 9 donasini 9900 AQSh dollariga sotib olmoqchi bo‘lgan va sotuvchiga kelishilgan pul mablag‘ini bergan. Biroq sotuvchi ular bergan xorijiy valyuta soxta ekanligini bilib qolib, pullarini o‘z egalariga qaytargan.

Qalbaki dollarni o‘tkazish bo‘yicha hiylalari ish bermagan fuqarolar pullarni arzonroq narxda haqiqiy valyutaga almashtirish uchun Toshkent shahri tomon yo‘lga chiqqan.

DXX va Bosh prokuratura huzuridagi departament tomonidan yo‘l harakati xavfsizligi xodimlarini jalb etgan holda o‘tkazilgan tezkor tadbirda mazkur shaxslar kelayotgan avtomashina Toshkent viloyatining Yuqori Chirchiq tumanida to‘xtatilgan. Tekshiruv davomida ulardan qalbaki 10 100 AQSh dollari protsessual tarzda rasmiylashtirib olingan.

Shuningdek, Namangan viloyatining Uychi tumanida yashovchi fuqaro Yangiqo‘rg‘on tumanida istiqomat qiluvchi sherigi bilan Namangan shahridagi aksiyadorlik tijorat banki xodimining ishonchiga kirib, qalbaki pullarni haqiqiysiga almashtirmoqchi bo‘lgan. Ular o‘zlarida mavjud bo‘lgan katta miqdordagi qalbaki AQSh dollarini unga bankdagi detektor orqali tekshirib ko‘rishini, agar qurilmadan o‘tsa, ularni haqiqiysiga almashtirib berishini, evaziga har 1000 AQSh dollari uchun unga 200 dollardan berishlarini aytgan.

DXX va Iqtisodiy jinoyatlarga qarshi kurashish departamentining viloyat boshqarmalari tomonidan o‘tkazilgan tezkor tadbirda ikki qonunbuzar shaxs qalbaki 7050 AQSh dollarini haqiqiysiga almashtirish uchun bank xodimiga bergan vaqtida ashyoviy dalillar bilan ushlangan.

Ta’kidlanishicha, har ikki holatdagi qalbaki 50 dollarlik kupyuralar xorijdan kontrabanda yo‘li bilan O‘zbekistonga olib kelingan.

Hozirda ushbu fuqarolarga nisbatan qo‘zg‘atilgan jinoyatlar ishlari doirasida qalbaki xorijiy valyutalarning kelib chiqish manbalari va ularning respublikaga olib kirilishiga aloqador bo‘lgan shaxslarni aniqlash bo‘yicha zarur chora-tadbirlar amalga oshirilmoqda.

Avvalroq Farg‘onada qalbaki 25 ming dollarni muomalaga kiritmoqchi bo‘lgan shaxslar ushlangani, Zangiotada qalbaki 5 ming dollarni 2,5 ming dollarga sotmoqchi bo‘lgan shaxslar qo‘lga olingani to‘g‘risida xabar berilgandi.