Андижонда қалбаки долларлар эвазига 9 та iPhone 12 сотиб олишга, Наманганда эса қалбаки пулларни банкка ўтказишга уринган шахслар ушланди

Тошкент вилоятининг Юқори Чирчиқ туманида қалбаки АҚШ долларларини муомалага киритишга уринган шахслар қўлга олинди. Бу ҳақда ДХХ матбуот хизмати «Дарё»га маълум қилди.

Маълум қилинишича, Андижон шаҳрининг Янгибозор ҳудудида жойлашган савдо мажмуасига 4 нафар фуқаро келиб, нархи 1100 доллар бўлган iPhone 12 русумли уяли алоқа телефонининг 9 донасини 9900 АҚШ долларига сотиб олмоқчи бўлган ва сотувчига келишилган пул маблағини берган. Бироқ сотувчи улар берган хорижий валюта сохта эканлигини билиб қолиб, пулларини ўз эгаларига қайтарган.

Қалбаки долларни ўтказиш бўйича ҳийлалари иш бермаган фуқаролар пулларни арзонроқ нархда ҳақиқий валютага алмаштириш учун Тошкент шаҳри томон йўлга чиққан.

ДХХ ва Бош прокуратура ҳузуридаги департамент томонидан йўл ҳаракати хавфсизлиги ходимларини жалб этган ҳолда ўтказилган тезкор тадбирда мазкур шахслар келаётган автомашина Тошкент вилоятининг Юқори Чирчиқ туманида тўхтатилган. Текширув давомида улардан қалбаки 10 100 АҚШ доллари процессуал тарзда расмийлаштириб олинган.

Шунингдек, Наманган вилоятининг Уйчи туманида яшовчи фуқаро Янгиқўрғон туманида истиқомат қилувчи шериги билан Наманган шаҳридаги акциядорлик тижорат банки ходимининг ишончига кириб, қалбаки пулларни ҳақиқийсига алмаштирмоқчи бўлган. Улар ўзларида мавжуд бўлган катта миқдордаги қалбаки АҚШ долларини унга банкдаги детектор орқали текшириб кўришини, агар қурилмадан ўтса, уларни ҳақиқийсига алмаштириб беришини, эвазига ҳар 1000 АҚШ доллари учун унга 200 доллардан беришларини айтган.

ДХХ ва Иқтисодий жиноятларга қарши курашиш департаментининг вилоят бошқармалари томонидан ўтказилган тезкор тадбирда икки қонунбузар шахс қалбаки 7050 АҚШ долларини ҳақиқийсига алмаштириш учун банк ходимига берган вақтида ашёвий далиллар билан ушланган.

Таъкидланишича, ҳар икки ҳолатдаги қалбаки 50 долларлик купюралар хориждан контрабанда йўли билан Ўзбекистонга олиб келинган.

Ҳозирда ушбу фуқароларга нисбатан қўзғатилган жиноятлар ишлари доирасида қалбаки хорижий валюталарнинг келиб чиқиш манбалари ва уларнинг республикага олиб кирилишига алоқадор бўлган шахсларни аниқлаш бўйича зарур чора-тадбирлар амалга оширилмоқда.

Аввалроқ Фарғонада қалбаки 25 минг долларни муомалага киритмоқчи бўлган шахслар ушлангани, Зангиотада қалбаки 5 минг долларни 2,5 минг долларга сотмоқчи бўлган шахслар қўлга олингани тўғрисида хабар берилганди.