Farg‘ona viloyatining Qo‘qon shahrida bozordagi to‘lovlar miqdori va shartnoma narxlari oshirilganidan norozi bo‘lgan savdogar ayollar avtomobil yo‘lini to‘sib qo‘ydi. Hodisa videosi ijtimoiy tarmoqlarda tarqalgan.
“Daryo” muxbirining aniqlik kiritishicha, voqea 2021-yilning 13-aprel kuni sodir bo‘lgan.
Qo‘qon shahridagi bozorlar va savdo majmualarida bir martalik yig‘imlar, ijara va ko‘rsatiladigan xizmatlar uchun to‘lov miqdorlarining oshirilishi tadbirkorlarning noroziligini keltirib chiqargan. Shu sabab bir guruh savdogar ayollar mahalliy aholi tomonidan “Yangi bozor” deb nomlanuvchi savdo majmuasi oldidagi yo‘lni to‘sib qo‘yish orqali noroziligini bildirgan.
“Qo‘qon savdo kompleksi” hududidagi do‘konlarda savdo qiluvchi tadbirkorlarning ma’lum qilishicha, bozorda ijara to‘lovlari qariyb ikki barobarga oshirilgan.
“Avval bozorimizda bir metr kvadrat joy uchun ijara to‘lovi 22 ming so‘m edi. 1-apreldan boshlab narx ikki barobarga oshib ketdi. Endilikda bir metr kvadrat uchun 40 ming so‘m qilib narx belgilashdi. Narx oshishiga qarshi emasmiz, lekin birdaniga shuncha ko‘tarib yuborishadimi? Biz xarajatlarimizni qanday qoplaymiz? Sotayotgan narsalarimizning narxini ikki barobarga oshirsak, odamlar bizdan hech narsa olmay qo‘yishadi”, — deydi “Yangi bozor” hududida kiyim-kechak sotuvchi tadbirkorlardan biri.
Qayd etilishicha, Qo‘qon shahar hokimi Ma’rufjon Usmonov voqea joyida bo‘lib, “Qo‘qon savdo kompleksi” hududida savdo qiluvchi tadbirkorlar hamda yo‘lni to‘sib qo‘ygan ayollar bilan uchrashgan.
Tadbirkorlarning murojaatini o‘rgangan shahar hokimi bozor hududida savdo qilish uchun bir metr kvadrat hisobida to‘lanadigan ijara haqi avvalgi tarif bo‘yicha hisoblanishini ma’lum qilgan. Bozor mutasaddilariga tadbirkorlar uchun munosib sharoit yaratish bo‘yicha ko‘rsatma bergan. Shundan so‘ng bozor oldida to‘plangan tadbirkorlar tarqalgan.
Holat yuzasidan viloyat hokimligining rasmiy munosabatida aytilishicha, viloyatdagi bozorlar va savdo komplekslarida bir martalik yig‘imlar, ijara to‘lovi va ko‘rsatiladigan xizmatlar qiymati pasaytirilgan.
Ma’lum qilinishicha, 2020-yilda koronavirus pandemiyasi davrida yuzaga kelgan iqtisodiy beqarorlikni hisobga olgan holda, bozorlar va savdo komplekslarida bir martalik yig‘imlar, ijara to‘lovi va ko‘rsatiladigan xizmatlar qiymati miqdorlari oshirilmagan.
Viloyat moliya bosh boshqarmasi va davlat soliq boshqarmasining qo‘shma taklifini inobatga olgan holda 2021-yil 1-apreldan Farg‘ona viloyatidagi bozorlar va savdo komplekslarida bir martalik yig‘imlar, ijara to‘lovi va ko‘rsatiladigan xizmatlar qiymati miqdorlarining yangi stavkasi tasdiqlangan. Yangi stavkalar bozorlar va savdo komplekslarda faoliyat yuritayotgan tadbirkorlik subyektlarining e’tirozlariga sabab bo‘lgan.
“Shunga ko‘ra, viloyat hokimligi tomonidan ushbu e’tirozlarni o‘rganish maqsadida maxsus ishchi guruh tuzilib, holat to‘liq o‘rganib chiqildi. O‘rganish natijasiga ko‘ra, bozorlar va savdo komplekslarida bir martalik yig‘imlar, ijara to‘lovi va ko‘rsatiladigan xizmatlar qiymati miqdorlarini oshirish bo‘yicha viloyat moliya bosh boshqarmasi va davlat soliq boshqarmasi tomonidan kiritilgan qo‘shma taklifning asoslantirilmaganligi, yig‘imlar, ijara to‘lovlari va xizmatlar miqdorlari uchun belgilangan yangi stavkalar tadbirkorlar uchun maqbul emasligi va ularning haqli e’tirozlariga sabab bo‘lganligi aniqlandi.
O‘rganish natijalaridan kelib chiqib, 2021-yil 1-aprelda tasdiqlangan bozorlar va savdo komplekslarida bir martalik yig‘imlar, ijara to‘lovi va ko‘rsatiladigan xizmatlar qiymati miqdorlariga tegishli o‘zgartirishlar kiritish, ularni keskin pasaytirish bo‘yicha tegishli qaror qabul qilindi”, — deydi Farg‘ona viloyati hokimining birinchi o‘rinbosari Avazbek O‘rinboyev.
Mazkur hodisa ortidan bozor hududida savdo qilish uchun ijara to‘lovlari pasaytirilganini tadbirkorlar tasdiqladi. Ma’lum bo‘lishicha, viloyat hokimining tegishli qarori bilan bir metr kvadrat joy uchun ijara to‘lovi 40 ming so‘mdan 25 ming so‘mga tushirilgan.
Maqola nashr etilishi arafasida viloyatning Rishton tumanidagi dehqon bozorida qishloq xo‘jaligi mahsulotlari sotish bilan shug‘ullanuvchi bir guruh ayollar ham “Daryo”ga murojaat qilib, bozorlardagi kunlik ijara to‘lovlari oshishidan noroziligini bildirdi.
Ma’lum bo‘lishicha, Rishton dehqon bozori rastalarida savdo qilish uchun bir metr joy narxi 5 ming so‘mdan 8 ming so‘mga oshirilgan.
“Ilgari bir metr joy uchun to‘lov 5 ming so‘m edi. Men uch metr joyga bir kunda 15 ming so‘m to‘lardim. Endi bir metr joy 8 ming so‘mga ko‘tarildi. Hozir savdo yaxshi emas. Bir kunda joy uchun shuncha pul to‘lashga qurbim yetmaydi. Soliq to‘lovlari ham baland. Uch nafar farzandim bor, turmush o‘rtog‘im 2-guruh nogironi. Bitta farzandim shartnoma asosida o‘qiydi. Sharoitimizni tushuntirsam, tushunishni istashmayapti. Pulini to‘lay olmasangiz, joyni bo‘shatib qo‘ying, deyishdi. Bozordan chiqib ketsam, qanday tirikchilik qilaman? Borib ‘temir daftar’ga yozdiring, deyishdi. Shu yoshgacha birovdan bir narsa so‘ramaganman. O‘z mehnatim bilan kun ko‘rishga o‘rganganman. Bu yerda menga o‘xshagan sharoiti og‘ir ayollar ko‘p. Sherigimning ham ikki nafar farzandi shartnoma asosida o‘qiydi. Narx masalasini qayta ko‘rib chiqishlarini istaymiz”, — deydi Rishton dehqon bozorida savdo qiluvchi Hurmatoy Shermatova.
Holat yuzasidan “Daryo” surishtiruvi davom etmoqda.
Izoh (0)